السلام عليكم ورحمة الله وبركاته
 
الى كل شباب مصر الشرفاء الأوفياء المخلصين
 
ياتري كل واحد فينا  فكر مع نفسه ولو للحظه هل التغيير اللى احنا عملناه كان تغيير واسقاط للنظام ولا تغيير واسقاط لمساوءنا احنا وعيوبنا هل فكرنا لحظه فى المميزات والعيوب لثورة 25 يناير
انا في رأيي ان احنا صلحنا حاجات كتير قوي يمكن من انفسنا قبل اسقط النظام يمكن لو كنا عملنا كده من زمان كان كل شيء اتغير من حوالينا لوحده  حيث ان الله عز وجل قال فى كتابة الكريم
إن الله لا يغير ما بقوم حتى يغيروا ما بأنفسهم"
 ولكن خلاص ما حدث قد حدث بالفعل ولكن لابد وان نعي جيدا من وقتنا هذا والى اخر العمر ان التغيير كان من انفسنا قبل تغيير النظام كل شيء عملناه حلو وبصدق وباخلاص عاد علينا بالفعل عاد علينا بايجابيات كثيرة جدا
- مش هارمي ورقة ولا شيء مسيء على ارض بلدي اللى هي ملكي بتاعتي
- مش هادي رشوة عشان اخلص واخلص وعشان مش فاضي ان اشتكي واقول لأ
- هاحافظ على بلدي واحميها وماعملش اى شيء يسيء اليها وماسمحش لحد يتكلم عنها بشكل سيء
- مش هاعاكس بنات ولا اغلس عليهم لأني عارف ان دا ممكن يحصل مع امي أو اختي او زوجتي أو بنتي
- مش هامشي عكس الاتجاه واعرض نفسي للمسئولية والاحراج
-هاحترم الاشارة حتى لو مفيش عسكري واقف
هاحترم  نفسي أولاحتي انال احترام الآخرين
- هاحترم ضابط الشرطة وأجبرة على احترامي باحترامي لنفسي
- هاطلع على القوانين والواجبات المفروضه عليا وأيضا  حقوقي
- أكون ايجابياً وافعل كل شيء بايجابية والغي السلبية اللى كنت فيها
- هابلغ جهاز حماية المستهلك لما الاقي حد بيبيع  غالي او مش ملتزم او استغلالي
-أنمي مننفسي ومن علمي وفكري واحاول اني انفع غيري بما تعلمته
اقدم بلاغ ضد أى تعديات من الشرطه أو المرور او اى جهه مش شايفه شغلها صح
- هافتخر ببلدي وبحضارتها وبكل شبر فيها وبكل فرد فيها
- اقدم كل حاجه حلوة لنمو بلدي واغير منها بتغييري لنفسي أولاً
أساعد المحتاجين واعاملهم باحترام
- هاعامل كل مهني فى مهنته واقدره

-هاعامل القهوجي زى الدكتور زي الضابط كل واحد بيساعد باللى بيعرف وبيقدر عليه
-هانطالب كل أب انه يعلم أولاده ويدخلهم مدارس لازم نقضي على الجهل

- مش هانفرق مابين مسلم ومسيحي كلنا شعب واحد ايد واحده

- هابر والدي واحترمهم وأقبل ايديهم وأكن لهم كل التقدير والاعتزاز

-هاذاكر وأنجح واروح مدرستي ومش هاهرب من المدرسة وانط من فوق السور
- هاعامل المدرسين أساتذتي باحترام واقدرهم لأنهم يعلموني مالم أعلمه

-واخيراً وليس أخراً هل حد فكر فينا اننا عملنا  ثورة عشان نغير من أنفسنا وان الحلم فعلا بقى حقيقه وان اليوم ده بقى فى التاريخ
سوف يفخر منا بما قدم وبما شارك وسوف يحكي فيما بعد لأبنائه وهو يفتخر بما قدم وشارك وضحي
طب الناس بقى اللى خربت وسرقت ونهبت وقتلت  يا ترى هاتحكي تقول ايه لأبنائها يا تري هايفتخر بردو بما قدم بما سرق ونهب وقتل ياترى هايفتخر ..... أشك انه هايفتخر بل سيظل طوال عمرة يحتقر من نفسه يحتقر من بشاعة ما حدث منه من تدمير فى منشآت بلده وتخريب كل شيء حلو فى بلده اللى هو بدون وعي مايعرفش ان الحاجه دي هو اللى دافع تمنها
سيظل يحتقر من نفسه ويتكسف دايما انه سرق ونهب شيء مش من حقه واعتبره حق مكتسب ليه  هاتقول بقى لأولادك
عار عليك أيها المخرب أيها الفاسد أيها القاتل  ونصيحه مني انت لازم تغير من نفسك وترجع أى شيء سرقته أو اعتبرته حق مكتسب ليك
لازم تصلح ما فعلت والفرصه مازالت أمامك للتكفير عن ما فعلت وما أجرمت
ارجع الي الله وفر الى الله الوقت مش فى ايدك والعمر ليس به بقية
كفر عن سيئاتك وبادر وثق انك ترضى الله عز وجل واعقد النية انك تغير  من نفسك وتغير من عاداتك السيئه ولا تياس من رحمة الله وان الله غفور رحيم بس بشرط انك تبادر وتبدأ  حتى تفتخر بالتاريخ وانك تلاقي شيء محترم تحكي عنه لأولادك اللى لازم يكونوا شرفاء أوفياء مخلصين لله  ثم لبلدهم  ثم ليك ولأنفسهم 
أسأل الله ان يغفر لكم وأن يرحمكم وأن يهديكم  إن شاء الله تعالي
وأسألكم قراءة الفاتحه على أرواح شهداء 25 يناير من شباب وبنات كبار وصغار  ورجال الأمن والشرطة اخويا وأخوك كلنا ايد واحده شعب واحد نعيش فى وطن واحد 

مصر أم البلاد اللى هاتفضل غالية علينا ما حيينا

-------------------------------------------------------------------------------------
Khaled Yasser
E-Marketing
0195123450 - 0114713828