صعبان عليا ياوطن
كنت الدفا حضن وبيت
بقي كله فيك شايل الهموم
واحلامنا جمب الحيط
العيشه ليه متغلفه بالأكتئاب
فقر وألم وبحور عذاب
ننام على حزن وشقى 
نصحى ما نلاقى الصحاب
ولما يوم يجينا الفرح
تملي يجينا بالتقسيط
وحتى العيشه بالتقسيط
كمان الضحكه بالتقسيط
غلبنا فيكى يادنيا
تعبنا بجد م التنطيط
وحتى اللقمه زلانا
ودنيا تملى كرهانا
ووخدانا لسكه ويل
دِبل ورقك م التفنيط
بقابل ناس وأشوف 
الدمعه بعيونهم
مفيش راحه
ونفسى أقولها بصراحه
قلوبنا بكتر أحزانا 
بقت داخله على التفتيت
وشايفك ياوطن واقف
ورامى كل أحلامنا 
بجمب الحيط
ماتصرخ ياوطن وأزعق
من اللى خانوك
وهات حقى 
وهات عمرى 
وهات نفسك من اللى خدوك
وطلبو الديه من نيلك
ومن هرمك ومن أرضك
سنينك كلها راحت 
وأنا ببكي ومتكتف 
وحتى لسانى ما بينطق
وقلبى م الوجع ينزف 
من اللى باعوك
بدور بس على ضحكه 
ولما الاقيها راح يبقي معاها
شيكات على الابيض 
واخدها برضو بالتقسيط
ياعم الوالى ياحاكم 
بتفرح لما ليه بنموت
ماسك حبال المشنقه
متعلقه فوق البيوت
كفنتنا ليه بالسكوت
لافف خيوطك ع الضلوع
عاوز تمشينا بريموت
بس سكوتنا هيبقى نار
ساعه ما نخرج م التابوت
مين اللى قالك اننا 
نرضى بخيوط العنكبوت
يمكن سكوتنا ليه سبب
ولاحد فينا يوم يكون أبداً عبيط
ياعم الوالى ياحاكم على انفسنا 
رمتنا ليه فى قعر البير
ونازل فينا حبس وقتل
مفيش عندك شويه دم
ولا انت معدوم الضمير
خليت حياتنا كلها 
أحزان وفقر ومسكنه
وحاجات كتير متلخفنه
جوه قلوبنا المظلمه
وشبعنا منك عكننه
لازم نعلى الضحك 
فى عيون الوطن 
شدو حزام العزم بكل بيت
وأضحكو ضحكه أمل
متكونش يوم ليها ورق
ونشيل كمان من تحتها
ضحكه مباعه للغلابه 
بدون مقدم م الولى 
ضحكه بلادى الفللى 
لشعب ملياه الشهامه وجدعنه
والطيبه فيه متسكنه وحبه خليط
والضحك من كتر القرف 
بعناه خلاص بدون تمن 
وكل الضحك بالتقسيط