يقلم الصحفى أحمد حافظ /على فكرة وزارة التعليم ما بتعملش تحريات أمنية عن طلاب الثانوية العامة الأوائل قبل الوزير ما يكلمهم علشان يعرف دي أبوها إخواني ولا أبوها له ميول سياسية ولا عضو في جماعة إسلامية، مفيش منطق في الدنيا يقول ده بيحصل، علشان الناس اللي بتتكلم عن إن الوزير رفض يكلم طالبة من الأوائل ويهنيها على نجاحها علشان أبوها إخواني ومحبوس، الوزارة ملهاش دعوة أبوها مين ولا حي ولا ميت ولا محبوس ولا محكوم عليه بالإعدام، أسماء الأوائل اتحددت أول امبارح السبت الساعة ٥ العصر، وعددهم ٩٣ طالب، والوزير كلم ١٠ فقط لا غير من ال٩٣ امبارح الساعة ٩ الصبح.

هتقوللي اشمعني كلم ١٠ بس؟ هقولك كلم ١٠ بس لأنه اختار أول ٣ من كل شعبة (علمي علوم- علمي رياضة- أدبي) بالإضافة للطالب الأول على المكفوفين، والطالبة اللي الكل بيتكلم عنها كانت رقم ١٣ في كشف شعبة العلمي علوم، وكلهم أول مكرر، يعني كلهم زيها في المجموع (٤٠٩،٥) وتم اختيار الثلاثة وفقا لحروفهم الأبجدية ( حرف الألف وما يليه مثل أبانوب وأحمد وأسماء) وهكذا يتم الترتيب وفقا للأحرف الأبجدية في حال التساوي في المجموع، هتقوللي اسمها أميرة يعني (أولها حرف ألف) هقولك تاني حرف في اسمها (ميم) وقبلها أسماء تاني حرف فيها (ب- د- س) علشان كده الكمبيوتر رتبها كده وعشان كده اتصل الوزير ب٣ طلاب في شعبة العلمي علوم هي مش فيهم لأن ترتيبها ١٣ في الكشف بتاع شعبتها.

أنا بشرحلك بالبلدي وبطريقة مبسطة جدا علشان من حقك تعرف الأمور دي بتمشي إزاي، أنا لا بدافع عن الوزير ولا يعنيني الوزير يتهاجم ولا ما يتهاجمش، أنا بيني وبينه خلافات جوهرية، بس واجب أخلاقي عليا أتجرد من الخلافات دي وأقولك الحقيقة المجردة، وتعرف ليه الوزير ما كلمش أميرة اللي باباها إخواني لأن دي ما فيهاش إخواني ولا سيساوي، فيها طالب خلع عباءة أسرته بما لها وما عليها منذ دخول الامتحان حتى ظهور نتيجته..

كفاية مزايدات سياسية لأن عندها منها كتير، بس هي دي الحقيقة، إن كنت تثق صدقها وإن كنت لا تثق فهذا حق لك، قل ما شئت فلا أملك سوى احترام رأيك.