((  لَــوْعَــــــــه  ))
ــــــــــــــــــــــــــــ
برَغمْ البُعْدْ عَنِّــــكْ         عُمْرِي مَا حَانْسَـى إنِّك
 أبُويَا وأمِّي وإبـني          ورُوحِي وحِتَّه مِـــنِّي
وغِنْوَه حِلوَه تُقُـولْ لِي :     النَغَمْ دَه أصْلُه مِنِّــكْ
*****
مِنْ بِيْنْ ضُلُوعِي حَنِينِكْ       بِيرْسِمْ رُمُوشْ عِينِيكِيْ
وينْدَه رَبيعْه ف سِـنِينِكْ      ويمْحِي خَرِيفِي بإيدِيكِيْ
*****
برَغْم البُعْد عَنِّــكْ          بَاحَاوِل اهَدِّي شُـوقَي
بَاحَاوِل واحَاولْ لكِنِّكْ       مَزْرُوعَه جُوَّه فْ عُرُوقِيْ
*****
مَزْرُوعَه بِوَرْدِكْ وفُلِّكْ        وفَرْحِة قَلْبِي بمِيعَـادِكْ
ورْمُوشِي اللِّي حَاضْنَه ضِلِّكْ     بتِمْسَحْ تُرَابْ بعَادِكْ
*****
أنَا بَحْرْ والمُوجْ خُدُودِكْ     أنَا شُوقْ النَغَمْ لِعُـودِكْ   
  
أنَا لَحْظه مَا بِيْنْ شُرُودِكْ    أنَا إيْه مِنْ غِيرْ وُجُودِكْ ؟
*****
بِرَغْمْ البُعْدْ عَنِّــكْ      صَاحِي فى قَلْبِي حُــبِّكْ
شَاورِي والأمْر أمْرِكْ      واسقِينِي مِنْ شَهْد قلْـبِكْ
*****
أفْدِي بعُمرِي دَمْعِكْ         وارْهَنْ حَيَاتِي لقُربِــكْ
برَغْم البُعْد عَنـِّك          بَاحَايلْ جُرُوحِي وهَمِّـكْ
واسْألْ عُيُون الصَبَايَا         إمْتَى برُوحِي أضُمِّكْ ؟؟
إمْتَى بِرُوحِي أضُمِّكْ ؟؟؟؟
*******
الشاعر رفعت ابو العلا