زجلية : آش بقى ؟؟؟ =============
آش بقى الى ضاعت المعنى
ومشات القافلة بلا راعي
آش بقى الى خربت الأرض
وخمج بطيخي ودلاعي
آش بقى الى سكت العاقل
وبقى صوت الفتنة ساعي
آش بقى الى تصمت الآذان
وتاه الحق
بين المرعي والراعي
كثرت الأقوال قلالت الأفعال
تهارشت الأصوات
بسم اللفاعي
الوجوه ولات قناع
شي شاري وشي باع
الشرف تلف وذاع
يبري في الأرض على
اللي ينقذو من الضياع
صوت الضمير وقف
بين الراس والقاع
شي يكذب من جهة
وشي يزور من جهات
تخروضت الميهة
ولون الحق بهات
الحكمة ولات سفيهة
وقيمة الجهل علات
والكلام المحرف
طلع ليه الباع
جول في الدنيا
تلقى الحرام لماع
بمية نوارة وجذر واحد
وشي مخدوع وشي خداع
والحلال هاز نوارة فظهرو
ويجول فالبقاع
ينادي في الأسواق
بين الشاري والبياع
الحلال ميثاق في عنق
المالك والرباع
... يزيد في الخير قيراط
ويحول ضيق الحال تيساع
الدنيا خداعة
واللي يتيق بيها طماع
السفيه تغويه بلطافتها
والعاقل يرميها بمقلاع
أنا ما نقول زماني مفجوع
... ولا الخير حاتل في القاع
غير وكان
مروة بنادم ولات رقاع
... ما يرضى يلبسها لا فقير
ولا لمحزم بشلا متاع
إدريس بندار
========
