((كلمة وداع))
************
يعني ايه ف العشق دايب 
و انت فجأة تقول وداع
يعني ايه اتنين حبايب 
و اللي بينهم فجأة ضاع
يبقي لسه الحب ساكن في القلوب
و العيون ويا العيون
من مجرد نظرة واحدة 
و العيون يا دوب تدوب
و الايدين ماسكين في بعض
و الدراع جوة الدراع
و انت فجأة تقول وداع
كنت فاكر ان حبك حب ناضج 
مش شعور مليان سذاجة 
عمري ما اتصورت طيشك 
ييجي يهدم كل حاجة 
قول وداعك سببه ايه 
ليه نويت تجرحني ليه
ليه القلوب تترك سلامها 
و تبتدي تخش في صراع 
و انت فرحان بالوداع
ليه الايدين تبدأ تسيب 
و الحبيب يهجر حبيب 
و الخطاوي 
اللي كانت جنب بعض في سكة واحدة 
تبقي ماشية في سكتين
و الدموع ع الوجنتين 
و النهاية بتتكتب فوق مركبين 
و ان كلمة واحدة بس علي الشفايف 
هي اللي بتزق الشراع 
هي كلمة الوداع

‫#‏خالد_محمد‬