(عم بشنــــدى)
*********
شفتوا حكاية عم بشندى
واجف جنب الدار يستنظر
ويشوف طلعة سيدنا لافندى
عاجبو المنظر
مهى دُنيتنا دُنيا مظاهر
دج يامظهر
وادى سلام لسعادة الناظر
جام واتشطر
ربى وعلم جيل الحاضر
بس خساره
نسيوا الجوهر
***
سيدنا لافندى
طالع متزين ...طالع متعطر
لابس بدله كلها جيمه
ولانجم السيما
شاب مغندر
والبهوات
شايلين له الشنطه
شغل أونطه
والله ماهوا... اكتر
هى ياناس الشنطه تجيله؟؟؟
يعنى هتتعب؟؟
ليه اللمّه والهولّيله
انا بستعجب
لو مجارش يشيل الشنطه
بحجم الكراس
وماشى منفوخ وسط اللمّه
وسط الحراس
يبجى أزاى
هيشيل على كتفه
هموم النّاس؟؟؟؟
***
فينك يابن الخطاب
لما كان بيكون صاحى
والناس نايمين
لما كان بيلف يدوّر
ع الجعانين
ويشيل على كتفه
وكان بيهزه
صوت فيه أنين
عم بشندى بص لفوج
وجلبو حزين
وجال يارب الطف بينا
يارب أمين
*****
عبدالله ابو النجا
