**بالكلمه نبنى وطن* بقـــــلم تامر النقيب**

بالكلمه نبنى وطن
بقـــــلم تامر النقيب
****************
هنرص طوب الأمل
ونهد طوب اليأس
ونزيل جدار المحن
ونعلى سور البلد
والشعر يبقى خليط
بالكلمه نبنى وطن
نفتح شعاع النور
لكل المجروحين
ونخف ضغط الألم
واللى بحياته حَزن
بالكلمه نبنى وطن
والفاس فى ايد فلاح
يزرع سنابل الدهب
للشمس هتنور
وشوش شقوق الأرض
وبإيدك الشقاينين
نضف بذور العفن
الشعر يبقى صديق
يكتب كلام عنك
ونقوم وننهض بالوطن
وبكلمه نبنى الوطن
والعامل اللى انظلم
يرجع على المصنع
يتحدى كل الصعاب
ويخلى جهده ف المكن
يرفع رايات النجاح
تدور تروس الزمن
ومصر ترجع مناره
وتغيب سنين الشجن
وبكلمه نبنى وطن
ياللى تحب البلد
سدد لها دَينك
خليك حاميها وراعيها
أكتب على جبينك
سيبك من الأحزاب
عسكر ولا أخوان
خليك يامصرى لمصر
بلدك دى ست الحسن
قول كلمتك متخافش
وإنسى سنين الشجن
خلى شعارك يا ولد
بالكلمه نبنى وطن
نفض قميصك م الألم
عاوزين نفوقو بقى
وأكتب حروفك (مصر)
خليها مش متفرقه
كسر قيودك م الجراح
لو حتى بالمطرقه
إنتج وصلح ف البلد
خلى الجبين يصرخ شقى
خلى الإيدين تكتب تاريخ
لشعب بيحارب الزمن
خلى الشعار دايما معاك
بالكلمه راح نبنى وطن
آن الآوان نضرب أيدين الغدارين
نضرب بقوة من حديد
عايشين سنين متغمين
نصبح على خوف يملا القلوب
ونبات على حزن وآنيـــــن
نتعشى نار وعذاب وويل
نفطر بطين نغدى طين
تنزل دموعنا ع الوطن
وإحنا أيدينا مكتفين
والضحكه جوة بالضلوع ملهاش سكن
عاوزينا شعارنا يابلد
بالكلمه راح نبنى وطن
إفرد جناحك يلا طير
شبك أيديك فى إيدن أخوك
وإسعى لخـــــير
خلينا ضد الدم والتخريب
حرام ولا إحنا إيه
مات الضمير
إفديها روحك يا ابن مصر
وخلى بصحرائها العبير
أطلع جبال اللى باعونا من سنين
بكرة الأمل هيدق باب المظلومين
شهدك يامصر
لسه أنا حاسس بطعمه
لسه بشرب ميتك
من نيلك الصافى الحزين
والله ماراح يبقى حزين
النيل دوا للموجعين
النيل أمل للبائسين
النيل ده حضن كل الحيارى
واللى تاهو جوه تيارنا الحزين
صوتك ياشارع هو صوت الغلبانين
صوتك ينادى بكل حق وكل دين
صوتك رنين
صوتك فرح للمهمومين
ودى رساله للى يوم
فاقد أمل وقال خلاص مفيش وطن
لكن أيدى بإيدك يابن بلدى
وكل شاعر فى البلد
وكل كاتب ليه قلم حارب المحن
لازم نخلى يوم شعارنا
بدون لاخوف ولا ثمن
بالكلمه راح نبنى الوطن
,,,,, تــــــامر النقـــــــيب,,,, من مؤلفاتى وليس منقولاً