**كانت حياة** بقلم وليد المصري**

كانت حياة

كانت حياة من غير أمل
كل اللي فيها وهم وعذاب
يا قلبي اصبر عل الالم
ده كل أجل وله كتاب

عاهدت نفسي ولا يوم أخونها
تقسى وآسامح علشان عيونها
كان كل همي تفضل ف قلبي
غَدَرِت كتير وحلفت أصونها

يا قلبي اصبر عل الألم
وافتح معايا كشفين حساب

كانت حِكاية حُب في السما عالية
رسمها قلبي فُوق السحاب
عِشت معاها كل ثانية
كانت حياتي وكل الصِحاب

وآدي النهاية .. دمعة غالية
ماتت حزينة علي الأحباب

لو كان بايدي ..
كُنت مَحِيت جُوايا صُورتك
وأقفل وراكي ألف باب

سألت بَعدِك عنِك عُيوني
قالتلي انسى ...
من امتي عاشق في الحب تاب !

ارضي بنصيبك وعِيشها ذكرى ...
وبلاش مَلامة وكُتر العِتاب

كانت حياة ..

وليد المصري