عماد عزيز (( العيد ))

العيد 
ما كانش عيدنا
ومعنى العيد ماهوش فرحة
لا فى بيتكم ولا فى بيتنا
العيد على كل الحبايب والصحاب
وأحلى ما فيه 
بروح الحب لمتنا
مسلم - مسيحى
كلهم فى العيد
يتلموا تحت القمر
والفرَح عناقيد
ولونه محلى دنيتنا
العيد دا عيد 
كل اللى متربع فى قلبه الحب
دا عيد مخلوط بدق القلب
ومن ايمتا يا عيد
بتتفرد على قبطى
والا ميلاد المصطفى 
يفرح معاه المسلمين
صلوا عليه ياللى انتوا مش عارفين
ياللى بتقولوا اننا فريقين
احنا النصارى معبيين 
من خير جموع المسلمين
مسلم مسيحى فى وحدة رابطانا
يا تقول كلام معدول
يا تلم ترحالك وتنسانا
دا اللى رابط بينا مصر
أرض جدى وارض جدك
واللى باقى ارض ابنى وارض ابنك
واللى منى واللى منك
واللى خالقنى وخالقك
ربنا المعبود بالحب يرعانا
جاى تقول العيد دا عيدى والا عيدك
انت مين ولاّك على قلب البشر
انت مين خلاك تشرع 
والا مين أصلا عطاك حكم القدر
عيد الميلاد
هو عيد كل البشر
والمولد النبوى الشريف
يجمع ما بين كل البشر
احنا المصاروة بحبنا
نقدر نعيد اللى انكسر
نقدر نزرّع فى الصحارى
والبرارى والحوارى
حبنا يطرح شجر
أعيادنا واحدة وجمعنا 
ما يفرقوش أى بشر
-----------------------------
كل سنة وانتم طيبين 
عماد عزيز --- الجمعة 9/1/2015