بحبك يا مصر ..تغريدة عشق مصرية بقلم الشاعر / احمد بيومي

.. بحبك يا مصر ..تغريدة عشق مصرية بقلم الشاعر / احمد بيومي
عارفين يا أخوانا..
الست الحلوه أم ضفاير على شكل النيل ..
الحلوه دي مصر ..
الحلوه إلي كلامها حكاوي ومواويل ..
ومحروسه بعناية ربي من عصر لعصر ..
أيوه ....الحلوه دى مصر ..
البلد الوحيده في الدنيا ..
إلي ما أقدر أفارقها ولو ثانيه ..
الحلوه دي مصر ..
حتى لما الهوى بيحرك ضفايرها وجريد النخل إلي حضنها ..
يتحول لنسيم ساعة عصر ..
الحلوه دي مصر ..
ومصر دي طول عمرها حنينه قوي ..
بتحس بكل وجع يتيم ..
وأنا يما حسيت فيها باليتم ..
عايش مخلوق من شتا على شكل الدموع ..
ولكن لإني على أرضها عمري ما حسيت أبداً بجوع ..
بمشي لوحدي فى حضنها في إيدي الشموع ..
ولما أتعب أحط خدي على أرضها ..
وكأنها أمي إلي بحبها ..
ولما أصحى أبوس إيديها وكفها ..
مليش غيرها في وحدتي ..
حتى لو كتبت عنها دائماً بفتكر كلام أمي وجدتي ..
وسعات الفضفضه فوق السطوح ..
يلدنا حلوه بأهلها ولازم كمان تتحسد..
ويبان الحقد فى عيون العدا ..
وهما بسألوها إنت ليه دائماً حلوه كده ..؟
وليه دائماً ماليه المكان..
وليه لما نزورك بنحس بشجن أيام زمان ..
وليه اللمه فيك بتختلف عن أي مكان ..
وليه حتى الهوا فيك مختلف ..
وليه التاريخ بيك وحدك يعترف..
وليه جنودك دائماً أسود ..
وليه ولادك بيصونوا تاريخ الجدود ..
وليه الكبير فيك له إحترامه وحافظ مكانه ..
مهما قالوا و باللسان المر هانوا ..
بس أنا زعلان ..
لأن صورتي وضحكتي إلي كانت ماليه وشى إتغيرت ..
وكأني كنت نايم طفل صغير ..
ولما قام من النوم لقى نفسه كبير والتجاعيد ماليه وشه ..
قام قرر إنه يكسر مراياته ..
قال يعني بكده معدش راح يشوف تاني التجاعيد ..
وفعل الزمن تاني في وجهه ..
ونفسه كل إلي فاته يرجع ويعيشه براحته ..
بس نسيت إن ساعات الراحه بتوجع ..
وأنا وجعي بسبب تصرفات شويه من ولادك كبير قوي ..
بحبك يا مصر ..تغريدة عشق مصرية بقلم احمد بيومي