. تغريدة عشق .. بقلم الشاعر احمد بيومى
حبيبتى ..اياك لما تشوفينى بضحك ..
تفتكرى انى سعيد قوى وطاير من الفرح ..
أنا بس الى دموعى ناشفه ..
و حتى لو فى يوم شفتينى ببكى ..
ده موش معناها ابدا انى بحس جوايا بالضياع..
فأنا زى صقور السما ..
عمرك شفتى صقر بيبكى مهما انجرح ..
وعلشان كده بكايا ممكن يتحس موش يتشاف ..
و لولا قدر الله كنا فى لحظه وداع..بردوا مستحيل ابكى ..
وانا من يوم ما حبيبتك وانا خايف يكون بينا فعلا فى يوم وداع ..
الحب يا حبيبتى اكبر كثير ..
من شويه دموع فى لحظه لقاء او حتى وداع ..
وربنا ما يكتب علينا ابدا نفترق..
عموما انا متاكد قوى انى احساسى بيك ما يتوصف ..
لان احساسى بيك فعلا عن كل نساء الدنيا مختلف ..
وكفايه بس انى احس انى عندك بردوا مختلف ..
وانك دائما بتحسى ناحيتى بالاشتياق ..
دا أنا قلبى بعدما عرفتك ..
علمته معنى الحب العميق اللى بطعم الوفاء ..
وعيونى بعدك يا حبيبتى ما عادت تشوف غيرك نساء ..
وكل لحظة عشق معاك بعشها بكل ذره من كيانى ..
من غير زيف ولا خداع ..
وعلشان كده مستحيل انساك ابدا ..
وهو ممكن الى زيك يتنسى ..
مهما جرى فى الدنيا من ظروف ..
بصراحه غير عيونك الحلوه دول ..
موش عاوز ابدا اشوف ..
واطمنى ..لا ممكن فى يوم اصبح نسيك ..
واقول كانت لحظات جميله وعدت خلاص ..
انا عمرى معاك انت ابتدى بجد ..
وكانى ما صدقت الاقيك ..
ونسيت بجد كل سنين العمر الى راح ..
عارفه انى بعتبرك بصدق تميمه حظى ..
واللى بتساعدنى دائما على النجاح ..
انت فى حياتى عود بخور وفنجان قهوتى ..
اللى بيعدل لى مزاجى ..
ويخلينى بسهوله احل اصعب الامور ..
والليله دى محتاجك قوى فاقربى ..
واياك منى تبعدى..
وادينى نفسك كلها و ما تخفيش ..
فانا يا حبيبتى بلمسك من هنا وانت هناك ..
عايشك بجد وبضمك لصدرى ..
لمابتعب من غير ما حس ..
فاحضنينى قوى الليله ..
وانا اوعدك باجمل حلم ..
تغريدة عشق احمد بيومى
