افيق من الغفله بقلم كمال مسرت

كمال مسرت 
=======
خواطر مراكشية /زجل بمناسبة اقتراب الحملات الانتخابية
========= ==================

فيق من الغفلة
ما سخيت نهجر ارضي و اهلي و حبابي**** نتسنا نور الامل فيك يا مهد اجدادي
ونركب مراكب الموت كي ركبو صحابي**** نصبح للحوت زاد بعدما كان زادي 
تهت في جناناتك يا الحمراء ضاقت رحابي**** لا حنين لا رحيم ابرد لهيب سهادي
ولا من ينور ظلام الطريق اسكن نحابي**** شوكهم يا هلي دماني و طعن كبادي
كل خمس حوال فيك ابان دجال ببابي***** بلسان الحق الزايف و البهوت انادي
يبهر بسيط العقول بالمال هو نهابي**** صبح الخاين الذليل بالنفود قيادي
تربع فوق الكرسي وخان حبابي**** نسا الوعود و ردم في الارض اوتادي
يا صاح قرا بين السطور تفهم كتابي**** تمعن في اسرار الكلمة تنال مرادي
واش من الطلح ينبت ورد سقاه عذابي**** واش الغدير اولي عين اصب فوادي
فهم يا الحر الغمزة لا تزيد فنكابي**** ولا تعطي ظهرك للدبزا مهمازهم حدادي
صوتك عزيز لا تدلو فدهالس الرحابي**** ولا تبخل به على صلاح بلادك و بلادي
رد بالك من ذاك الخماس يتمسح بالعتابي**** عيق وفيق راه يتاجر فزادك وزادي
ظنيناه احمي الحصيدة فحضورك وغيابي**** نهب المحصول شكون اجي لنجادي
لا تكون فسوقهم رخيس تزيد عذابي**** كن كي الطير الحر لمصايدهم ما يحادي
اعلي فالعلالي احمي و اصون ركابي**** ما تغويه طريدة ما يخدعو الغراب الشادي
يا صاح لا تغرك الحملة هرس الخوابي**** ابان الكنز واش ذهب ولا نحاس عادي
فينك يا زارع الخير نسقيه بسحابي**** وبرموشي نحميه ونداريه من عيون البادي
سألتك لله على الصفا عطيني جوابي**** نعد العدة لحروبهم ونسرج جوادي