كل اللى بينّا خلاص قدّام عينيا بينكسر بقلم ابراهيم فهمى المحامى

كل اللى بينّا خلاص قدّام عينيا بينكسر
وبتنكسر ويّاه سنين الحب
والآمآل والأمنيات
حتى نظره بريئه بتعبّر ع اللى جوّانا
غرقت فى بحر سكات
وماتت مع اللى مات
أصبح ما بينّا طريق غربه وسفر
تهنا جوّه نفسينا
فى طريق كله حفر
نسينا مين ابتدى بالهجر
ومين خنق القمر
مين اللى حوّل الغنوه حزينه
ومين قطع الوتر
مين اللى كتب النهايه فى روايه بتتبدى
مين حوّلنا فجأه لجثتين
مين حوّلنا دمعه فى كل عين 
مين خلاّنا جرح ما يندمل
مين اللى فك أحضان الايدين ساعة السلام
مين اللى خلّى الصمت يسجن جوّانا الكلام
واحنا اللى كنّا زمان يتحاكوا بنا العاشقين
ايه اللى حوّل قلوبنا لطريق مافهش شموع
وسابنا جوّه الغريق من غير شراع وقلوع
وعينينا بعد الفرح غرقت فى بحر دموع
مش باْسالك ترجعى
عمر اللى راح م يعود
لو لسّه بينّا كلام
عارفانى فين موجود
أنا قلبى يقدر يسامح
لو ترجعى ترضيه
وتدوسى فوق الفراق
لسّه الحنين موجود
قصيده عاميه/ لسّه الحنين موجود
شعر: ابراهيم فهمى المحامى