ـــــــــــــــــ غربةــــــــــــــــــــــ
حكاية
شب متغرّب للقمة عيش
وغيرو كتير
فى شعب فقير
بيتمنى يكون ويعيش..
لكن
يا حسرة مش لاقى
لقوت يومه
فى أحضانهارغيف العيش.
ولف كتير
فى الف طابور
وقف فى الدور
وأخرتها يقولوا ما فيش
ويجرى العمر ع الفاضى
ويتحسر
وأخرتها يروح يجرى على الغربة
ويدّاين
وألف روتين كأنو مسافر الجنه
يعقدوا فيه
لكن ما يمل
وبيسافر
يدوق المر
لكن يحلى عشان
تمشى الحياة وياه
ولو يضحك
تلاقى الضحكة مخنوقة بلون آلآاه
لكن حكمت ..
..
وعد ياعمر فى الغربة
بسكنه كأنها تربى
لكن غصب بلا طاعة
لازم نمشى ونتحمل
وفيها نحلّى ونجمّل..
عشان نمسك رغيف العيش
بطعم الذل والتهميش
..
وناس تقابلنا تتعالى وتتأفف
كفيل يحكم كانوا إلاه
ونار وحدة تاكل ويّااه
ورغم
عنا بنتحمل..
.
وأخرتها تقوم الحرب
ويعلا الضرب
ونتخبى كما الجرزان
ومش م الموت
لكن علشان مانقطعشى
سبيل العيش
ويوم ورا يوم يديق الحال
ويتوجب قضا الترحال..
..
نشيل رحنا
على كفوفنا
و نخرج نجرى فى الصحرا
كما الحملان
ونار الغدر تصطادنا
ونبقى ذكرى منسية
فى كان يا ما كان
لاحد فى غربة يرحمنا
ولا حكومه تأمنّا
عشان نرجع لأوطانا
وفيها نعيش....
......
ـــــــــــــــــــــــــــــــــــــــــــــــــــــــــــــــــــــــــــــــــ
سالم هاشم
2014
المنصورة
أعجبني
