عرس شاطي / بقلم الكاتب / خضير الحسني

هناك عالشاطي البعيد
آنه وأنتي
مثل جنحين وسوالفنه فخاتي
صوتهن بهداي يغزل ثوب نوم
لشط مواعيد العشك 
ذاب اعله خصره...
ولاله من الماي وجهك
جف اديك الناعم
الكلبي يعصره
هناك عالشاطي البعيد
والبنفسج لون دايفني بحلاتك
ورد طشاني اعله طولك
من مشيت...
ونكلة جدامك
جرس مشدود
ببتوت الكلب محد يسمعه
الشاطي من جدحة جبينك باك لمعه
ولون الماي بضواك...
وجان وجه غروبه ضحكة مستحاك
ونته يمي...
الدنيه كل الدنيه تضحك
والنوارس تسكف بجنح الفرح
بيت لعرسهه...
تهلهل لخطواتك الحلوات 
من تكطع نفسهه...
حنة آثارك على جفوف الرمل
ذابت شكار...
وخضرت شجرة شمع
بجفوف اديك
وغصنك الريان 
بشفاف النده المحروم
جن برعم نهار...
آنه من عينك صرت خايف عليك..
من تشوفك صوره وسط الماي
لا تشبك ضواك
وتغرك لآخر نفس
من تنسه روحك...
آه يروحك من تفتح عينهه
ومايبقى سوك
كل ميازين الذهب تنكر وزنهه
والمشاتل غيره منك تقفل البيبان
وتفتح حزنهه...
ركضة الاطفال حبات الرمل
تركض عليك...
نظرة عيونك حديقه
وجيتك مصباح عيد
ورمشة جفونك مراجيح وتهزني
دوس جدمك بوسه 
بخدود المسافه
كل شواطي الروح
فزت تشتهيك...
انطي لغروب الحزن
لون بضحكتك
من تمد ايدك تعال
وآنه حيره شلون أجيك
هناك عالشاطي البعيد....