ظلم الوكت/بقلم الشاعر/كاظم الخشالي

××× ظلم الوكَت ××××

حاربنه الوكت من يوم ....أجينه 

وجرحنه بلا سجاجين ...!!!

والعون التريده يوكَف وياك ...

ما شد الجرح ....

بالملح رشه 

عدوك من صديجك ...

ضاعوا بالحساب 

والكل ملهوف....

للموت ...

يريدك

ماندري...!!!

أجينا صح....

 للدنيه وجبنه الهموم ...

لو بالغاط....!!!

 والكل شد علينه ...

الغير عايش مرتاح البال ...

وأحنا الغزل... متخربط ...

 علينه 

كَظيناها صبر ...

ومكامش ويه الهموم 

كلما راح هم ..واحد يجينه 

ما عشنه صدكَـ ...

ولا شفنه المسرات

توالفنه ويه الحزن... 

من عرف بينه

صرنه ويه الحزن ناكل بماعون ...

واذا غبنه علية... يسأل علينه 

جنه الحزن ما يكَدر على الغير ...

طول العمر بس كادر علينه

المن نشتكي ..ونعرض الحال ...!!!

ملينه من الشكيه... 

وخلص حجينه ...

يوميه عرس ...نركص بنصه ...

وبالمأتم لطمنه ...

لا جره ولا صار ..

ومن ينصب الثريد...ما نندل...

 السفره

حصتنه الركص واللطم ...يا حيف

حظنه ضاع ...وما أله طلاب ...

يا وسفه 

هم عندنه أمل ....و الحال يتغير ...

هلبت الوكت ينصفنه ...

من ظلمه 

17/8/2014