جيتك عيد...
ـــــــــــــــــــــــ
(الك جانت يحلو الطول جيات
..عجب تبخل علينه بجية العيد )
وجنت أجيك ..الدنيه كل الدنيه تضحك
من أجيك..
من أدك الباب جن كلبي اليدكه
وينتظر عطشان عصفور اعله بابك
من تجي وظلك يسبكك
يطرز الملكه دلال
ياعطش والضحكه تتغاوه
اعله شفتك مي زلال
والعيون الشابكه البستان
بطروف السعف
تلعب نثايه
تضحك مرايات
والدهله اتمشه
لحظه وبجرفك تبدت
غركتني
بلم عشاري وضعت
حدر الرموش
وما اريد اشتم هوه
الما مر عليك
حيل مرتاح لخنكتني
من اشوف الماي
يتلاله بأديك
جانت الصبحيه عيد
وياحلات الباب
من نوكف سويه
نغرد سوالف فجر
كل مغربيه
ونسكر بجلمه
وجلمتين
ونظرتك
خدرت كلمن تشوفه
واذكر ايدك مست ايدي
فات كل عمري
وبعد اشتم عطرها
الحي تغير
وبيتكم سكنوه ناس
وبيه لهفه لعتبة الباب
ارد امرها
ابجي بس نص ساعه وامشي
بيها اهل سنين كل عمري
البعد مامرها شوك
وارد اظوك الحسره
بس بشفاف قيس
الما ابد حصله بوسه
وليلى سموها اعله اسمه
اي سموها اعله اسمه
ومن قريت القصه
غصيت بحلاتك
ياحلاتك لملمت
كل الاسماء الجميله
وفرهدتني
اشما يصيحون بأسم
أرجع زغير
واركض بواهس طفوله
بسابع النوم وافز
مطلوب ثار
وبيه حسره
بكد حلاتك
من اهد منها ربع
تكتلني موت
وما أموت
بس يمرمرني
اليغني
ويوصل لكلبي البريد..
(الك جانت يحلو الطول جيات..عجب تبخل علينه بجية العيد)
