الجزيء الرابع من مسرحية صرخة ولاد الشوارع
........................................
أحمد - ادينى 100 جرنان يا عبدالله 
عبدالله - ادى أحلى تشكيلة ربنا يجبرك 
صالح - هات خمس دست مناديل يا عبدالله 
عبد الله - خمس دست مناديل لصالح ربنا معاك 
انقضى اليوم الأول 
فى منزل صليب
صليب - مساء الخير 
مريم زوجة صليب - مساء النور .. الحمدلله على السلامة 
صليب - الله يسلمك ، إيه الأحوال ؟
مريم - الحمد لله ، خدلك حمام لحد ما أجهزلك العشا 
صليب - لا أنا مش عاوز اتعشى مليش نفس 
مريم - ليه انت أتعشيت برة والا إيه ؟
صليب - لا أبدا بس شبعان وعاوز أنام خفيف 
أما النهاردة حصل موقف 
مريم - موقف إيه ... خير يا صليب 
صليب - تلات عيال شغلتهم معايا بس حاسس انى عملت خير كبير 
مريم - منين العيال دول يا صليب 
صليب - عيال غلابة من اللى ملهومش أهل جونى وطلبوا منى الشغل وأنا شغلتهم بس عيال رجالة
مريم - وانت ازاى تعمل حاجة زى دى
انت تعرفهم والا تعرف أهلهم 
صليب - أنا معرفش غير انهم عاوزين شغل وأنا شغلتهم 
مريم - هما كانوا من بقيت أهلنا يا صليب مش ممكن يزعلوا الناس منك أو يسرقوك 
صليب - لا متخافيش اللى فيها لله ، عمرها ما تغرق 
مريم - طب خلى بالك احنا ملناش غير بعض .. حافظ على نفسك
صليب - سبيها لله
انقضى اليوم الثانى 
وبعد انقضاء شهر كامل 
صليب - تعالوا يا ولاد عشان نتحاسب
هات يا عبدالله كشكول الحساب وشوف أحمد موزع جرايد قد ايه فى الشهر اللى عدا 
عبد الله - حاضر يا عم صليب 
اول يوم 300 جرنال والتانى 320 والثالث .....
أحمد موزع 10200 حتة يا عم صليب 
صليب – ليك فى الحتة 15 قرش يعنى بحسبة بسيطة يبقى حسابك 1530جنيه يا أحمد وأدى فلوسك يا عم أحمد
أحمد - أنا عملت الفلوس دى كلها مش ممكن 
صليب - مش ممكن ليه ، أنت تعبت وده حقك ولو تعبت شوية كمان . هتكسب أكتر ومكسبك حلال 
أحمد - انا كان اكبرحاجة حلمت بيها انى أمسك 10 جنيه 1500 جنية الحمد لله 
صليب - 1530 ربنا يطرحلك فيهم البركة
شوفلى حساب صالح يا عبد الله
عبدالله - صالح اليوم الاول 40 دستة والتانى 36 دستة 
المجموع 1250 دستة يا عم صليب 
صليب - انت ليك فى الدستة 120 قرش ، وبايع 1250 دستة عفارم عليك يا صالح انت مجتهد زى أحمد ، كده يبقى حسابك 1500 جنيه ، وآدى يا عم صالح فلوسك أهى ، شدوا حيلكم وربنا معاكم 
صالح - يكاد قلبه يفارق اضلعه 1500 معقوله المنديل ابو 50 قرش يجيب كده ، الحمد لله
صليب - تعالى يا عبد الله خد حسابك تعرف انت ليك كام 
عبدالله - كل اللى ييجى منك كويس يا عم صليب 
صليب - لأ احنا بنا اتفاق واللى يخون الاتفاق يبقى بيخون نفسه مع ربنا 
انت تاخد نص اللى خده أحمد ونص اللى خده صالح يبقى انت ليك كام ؟
عبدالله - 1515 يا عم صليب 
صليب - مبروكين عليك اتفضل ادى يا عم عبدالله فلوسك
عبدالله - ربنا يباركلنا فيك يا عم صليب وميحرمناش منك أبدا 
صليب - يلا شوفوا مصلحتكم اللى عاوز يعمل حاجة يعملها وعاوزكم كلكم هنتعشى سوى النهارده هنروح مشوار سوى 
الثلاثه مغادرين - السلام عليكم يا عم صليب 
صليب - مع ألف سلامة 
صليب فى المنزل 
صليب - مساء الفل يا ست الكل 
مريم - ربنا يسعدك يا صليب شكلك مبسوط طيب مش تبسطنى معاك 
صليب - النهاردة اتحاسبت مع العيال 
مريم - وبعدين 
صليب - لو شفتى حالهم وأنا باحاسبهم 
والله الدنيا متساوى إنك تدخلى الفرحة على قلب الناس 
مريم - مش فاهمة 
صليب - الولاد كان ناقص يشيلونى من على الأرض شيل 
مش بقلك يا مريم ولاد غلابة وأصلهم طيب 
مريم - هتتعشى 
صليب - لأ أنا نازل عشان الشقة اللى فى البدروم هجيبهم يعيشوا فيها 
مريم - انت أكيد بتهزر 
صليب - العيال دى بتنام فى الشارع وده ميرضيش ربنا 
مريم - طيب وانت مالك انت ساعدتهم وشغلتهم وأنا سكت 
لكن كفاية لحد كدة مش ممكن تجيبهم عندك فى البيت 
صليب - صدقينى يا مريم العيال اللى خايفة منهم دول لو حصلى حاجة 
هما اللى هيقفوا جمبك وهيحموكى 
مريم - أنا مش عايزاهم يحمونى 
صليب -أنا خلاص قررت وعشان خاطرى خلينى أعمل حاجه تكون لله وأنا مبسوط بلاش تكونى انت اللى بتمنعينى من الخير 
مريم - خلاص يا صليب اللى انت عاوز تعمله اعمله وربنا يسترها عليك
صليب - مع السلامة أنا نازل وهقابل الأولاد وأديهم مفاتيح البادروم
وفى الليل حضروا جميعا 
الأولاد – السلام عليكم يا عم صليب 
صليب – يلا يا ولاد أنا مستنيكم وجعت 
تناول الجميع العشاء مع عم صليب لكنهم فى حال القلق ما المشوار الذى سيرافقون فيه عم صليب 
صليب - قاطع لحال القلق ...انتم اثبتم أنكم رجالة بجد وأنا عاوز اكافئكم 
صالح - أنت تكافئنا 
أنت أحسن من أهلنا اللى رمونا فى الشارع 
أنت اللى تستحق المكافئة
أحمد - أقسم بالله لو معايا فلوس لكنت كافئتك 
صليب - بابتسامة رضا وتعالوا عشان تشوفوا المكافأة ،
شوفوا يا ولاد ، انتم تعبتوا الشهر اللى فات ، واثبتم انكم رجالة وبتوع شغل ، ودى مفاتيح شقة صغيرة عندى فى البدروم بتاع 
العمارة ، وهى شقة صغيرة أوضة بثلاث سراير ومطبخ وحمام هتحميكم من نومة الشارع هى دى مكافئتى ليكم 
أحمد – مندهشا ، ازاى يا عم صليب انت بتقول ايه 
صالح - مش ممكن اللى بتقوله ده يكون حقيقة 
عبد الله - يرتمى فى حضن صليب ربنا يخليك لينا يا عم صليب 
انت مستحيل تكون بشر، انت ملاك ماشى على الأرض 
صليب - ولا ملاك ولا حاجة .. أنا معنديش ولاد وربنا بعتلى ثلاث رجالة مرة واحدة عشان يكونوا ولادى 
أحمد - ربنا يبارك لنا فى عمرك يا عم صليب والله ما عارفين نقولك ايه 
ربنا يكرمك 
صليب – بصوا يا ولاد ، الكتب دى كتب سنة ستة ابتدائى ، أنا اتكلمت مع واحد صاحبى ، . وقدملكم فى المدرسة وهتمتحنوا بأزن الله ، أيوه يا ولاد ، لازم تتعلموا وتنجحوا ، خلصوا شغل ، وارجعوا ذاكروا تعالوا على، نفسكم شوية وربنا يوفقكم وتاخدوا شهادة ، الشهادة هى اللى هتنفعكم.
عبدالله - يعنى أنا ممكن اتعلم ويبقى معايا شهادة وأكون إنسان محترم 
صليب - انت راجل محترم يا عبدالله .. بس الشهادة بتزيد احترام الناس ليك
صالح - تفتكر ممكن ننجح ونبقى متعلمين ولينا مكانة وسط الناس
صليب - اعملوا اللى عليكم وسيبوا الباقى على ربنا 
صليب - يلا بقى روحوا ، استريحوا وأوعوا السراير تخليكوا تتأخروا على الشغل 
ضحكة عالية تعلو وجه الجميع تركهم على اثرها عم صليب متجها الى منزله
الى لقاء والجزيء الخامس غدا بأزن الله
تحياتى لكم