حنين
---------
ولسانى بحن اليك
وأحن كمان لجدرانك
هنا صليت 
هنا غنيت
غناوى كتير على بابك
هنا عنبايه مزروعه
ماليها الشوك بتجرحنى
هنا ارضى اللى بأزرعها
وهنا جارتى بتلمحنى
وهنا بسمه بتتدارى
بشوفها والجبين محنى
وانا بأزرع ورود الشوق
وبأهديها لأحبابى
هنا واقف على بابى
وبأتكلم مع صاحبى
تعدى الحلوه يضفاير
اغمض عينى وادارى
ورا خجلى
واقول بكرة هكلمها
اكيد لازم افهمها
انا المدبوح قصاد عينها
وعينها اللى دبحانى
انا اللى كتير بأغنيلها
ولا مرة بتسمعنى
وهنا جاره تغازلنى
تقولى عنيك تلاحقنى
وانا راحه وانا جايه
وانا مكسوف ارد بأيه
دانا عمرى ما اكون ليكى
لأنى عشقتها هى
دى اجمل من بنات الحور
فى عز الليل
يبات قلبى يناديها
يبات فكرى يناجيها
تبات عينى بتتلمس خطاويها
واقول بكرة تكون ليا واكون ليها
وبكره الجاى مبيجيشى
ولو مره
نشف ريقى يا بنت الناس
وانا الحارس على الميه
منصور عبد المقصود