كتب  يسرى الهرش      

 الرجال

الرجال مابتنقاس بالمتر ولاابتنوزن بالميزان

الرجال مفاعيل وقة المظاييق تلقاها

مثل الذهب يوم تصهره معدنه ايبان

وكل مااحميت عله النار يزيد نقاها

ارجال ماتقبل الذل ولا الهوان

ارجال عز والزعمه اترعرعة جواها

ارجال تملاها التقوى والايمان

وان خيرتهي بين الفظايل تختار اسماها

يصبر على مصاب الدنيا ويعتمد على الرحمن

ويشرب مرار الصبر ويصبر على بلاها

تلقاه صادق وان رافقته حسيت بالامان

الصدق والشرف مبداه والنقايص مايدناها

تلقاه فول القوم ايزاحمهم على الاحسان

وراية الكرم والجود في السماء علاها

يحب الحق ويبعد عن دروب الشيطان

ويكره درب الباطل ومايريد ممشاها

ويصلح بين المتخاصمين بحكمه وتزان

ويكره دار الخصام واللي بناها

ويحب ايشوف الناس في الدنيا اتقول اخوان

ويسقي شجر الخير بالحب وبالوفا يرعاها

وهله عنده مافيهم خوخ ورمان

في قلبه مساكنهم وفي الشرايين ملقاها

يرحم الصغير وعطف على الشيبان

مثل الشفوق بالحنان اتلهله ضناها

ايجيك نص الليل انحسك عله زعلان

يرظيك وياخذ من نفسك ارظاها

ارجال صدق والرجل وقة الصدق اتبان

وخلك من ارجال الوسع ونساها

يضحك من شفافه لك ويخفي النيبان

وقت الملازم للوراء اتوسع اخطاها

يا صاحبي لا تغرك حلاوة اللسان

ما تنفعك يوم الدنيا ادير لك قفاها

خلك مع ارجال الصدق وعتمد عالرحمن

و بعد عن ارجال الكذب لا تلفاها

وختم كلامي بذكر ربي خالق الانسان

باسط الارض ورافع من غير عمدان سماها