بت مسلم حميده بضيم وَنـَتهــا * لحسيـن أعتنت ويِّ مجره دمعتها
تسأل والــدي وينـــه
أبونـا مـا رجـع لينـه
ـــــــــــــــــــ
لحسين أعتنـت والـدمعـه هَمـالـه * بلـﭼـن مـن أبوها فـد خبـر جالـه
شنهي العَوﮔـه ومارد على عياله * مَيِّـت لو عَـدل خبرني عن حاله
تسـأل والدمع عالخد يصب مــــدرار
شصار بوالــدي يا عمي ﮔلي شصار
الوالي تـأخـر علينـه * أبونـا مـا رجـع لينـه
ـــــــــــــــــ
يـا عمي أجيتـك حايره أتـﮔلـه * أجيتـك وبدليلـي اللوعـه والعِلـّـه
ما ﮔلك أبوي أيرد مِتى لأهله * تسأل والدمع عالخد دمـه تهلــــه
حاﭼينـي يَعمـي ولا تظـم عَنــــــي
مجنونه بغيابـه مو صرت ﭼَنـــــي
راح وﭼن ﮔطع بينـه * أبونـا مـا رجـع لينـه
ـــــــــــــــــ
بأحلامي أجاني وكحلت عيني * حاﭼيتـه بدمعتي وضل يحاﭼينـــي
بأخوانـي يعمي ضل يوصيني * مشغوله الفـكر واحلامي تـاذينـــي
فـَسـرلـي الحلـم ليش أنا وصانــي
كـَرَر بالوصيـه اَتفـﮔد أخـوانــــي
أظنـه غمضَـت عينـه * أبونـا مـا رجـع لينـه
ـــــــــــــــــ
دمعاتـك يعمي تِـﮔطَع أنفاسي * والأعظم بعد من إمسحت راســي
حسيت وابدما خاب أحساسي * منه تريـد ﭼن أﮔـطـَع بعد يـاســي
يتمنـي الـدهـر حَسيـت بـالـوالـــي
يــا عمـي أجيتـك والدمع هـالـــي
خـذنـه ويمـه وَدينـــه * أبونـا مـا رجـع لينـه
ـــــــــــــــــ
محتاجين نلتم يمـه ونشوفـه * محتاجيـن عمـي نقـَبـل أﭼفوفــــه
لاﭼـــن للمنيه تعنه وحتوفه * وبغـــدر الظليمه تلـﮔِتـه الـكوفـــه
أحســـاس اليِّتــم ببعـاده راودنـي
ﭼـن روج البحـر ياخذني ويردني
وطـَفـَوا شمعة سنينــه * أبونـا مـا رجـع لينـه
ـــــــــــــــــ
يا صورة أبوي الما تبارحنـي * ياعمي أريدنـــــك تصارحني
مذبوح أسمعت والخبر جَرَحني * ذباحـه يَريتـه ﮔبلـه ذابحنــــي
ريت الموت أخذني عمي ياعمي
ولا عيش العمر بعده بألم همـــي
راح ويَتـَم أبنينــــــه * أبونـا مـا رجـع لينـه
