إحساس اليتامى أحساسي
من تمسح إعله راسي
گلّي شحصل يحسين مسلم حبيبي وين
ـــــــــــ
آنه حميده بدمعتي وروحي إله ملهوفه
عوّد عيوني لشوفته وهسه تريد إتشوفه
ومن إمسحت راسي بحزن بدلالي صارت خوفه
مدري شجراله والدي بس أدري بي بالكوفه
طوّل عليّه إفراگه
ولشوفته مشتاگه
تسألني عنه العين # مسلم حبيبي وين
ــــــــــــــــــــــــــــــــــ
أتمنيتك أتكلّي رجع مسلم حبيبي الغالي
يمسح عن إعيوني الدمع والدي وينظر حالي
بس من شفتْ دمعك نزل ضاعت جميع آمالي
مايرجع الغالي أعرفت ويبقى يون دلالي
وآنه أسيل المدمع كلذي بعد مايرجع
وكلّلالي لاتحزنين مسلم حبيبي وين
ــــــــــــــــــــــــــــــــــــــــــــــ
خالي الحسين يصد إلي ودمعتي أتكلي جوابه
بالكوفه غدروا والدج آه عله حزن مصابه
ودمعتج تجرح بالكلب لمّن تظل سجابه
ومِثِلْ رقيه آنه أحسبج وانتي كليلي بابه
يجري الدمع ما اريده يبنيتي ياحميده
تآذيني من تبجين مسلم حبيبي وين
ـــــــــــــــــــــــــــــــ
بالليل أطبك ياجفن يالضيّعتها بنيتك
وبصدري تغفه حسرتي يابويه ماودّعتك
ولوطفله والدها حضر ياوالدي إتذكّرتك
مهضومه وأحجي ويه الكلب ياكلبي زيّد ونتك
والفاكد يون كلبه والونّه كلّش صعبه
ليله يخلصه ونين مسلم حبيبي وين
ـــــــــــــــــــــــ
مشتاكه بويه لشوفتك وتنظر عيوني عيونك
وزغير صح بعده العمر بس مايفيد إبدونك
ويلي عليك من القصر مجتوف ويدفعونك
وشلون حاله حالتك عالكاع ويجرّونّك
وبفركتك يا ويلي طفله وتهدم حيلي
يا روحي شتّانين مسلم حبيبي وين
ـــــــــــــــــ
عمري يخلّص بس ألم والحزن يسكن بيه
وبالكوفه بويه نلتقي لمّن أجي مسبيه
وأشكيلك شسوه الهجر جمّع هموم إعليه
ياعمر خلّص بس دمع من أوّله إلتاليّه
عمري خلص بالدمعه ويذوب مثل الشمعه
صوّب دليلي البين مسلم حبيبي وين
