والله ما انساك من تبعد يغالي
يبني ولملكاك راح احسب ليالي
ما يهم فكد البنين بس تردلي ياحسين
من تسافر ياحبيبي ابقــــــه بعدك للمصايب
وبغيابك شنهو عمري شنهو عمري وانت غايب
ياملاذي وكل و جودي شتسوه دنيه بلا حبايب
انت ارحل وانه عيـــني لجــــيتك تبقه تراقب
وياك اخذها العين ماتحمل غيابك
بروحتك يحسين تتركني لعذابك
ما يوالفني الانين بس تردلي ياحسين
عني ترحل يالرحيلك عندي اصعب من وفاتي
ياحيــــــاتي من اودعك يعني اودع كل حياتي
امنياتي كلــــــــها انت ويصعب افراك امنياتي
انت روحي روحــــي عندك لا تفاركني بغلاتي
ياحبيب الروح هجرانك مراري
كلبي كله جروح ياجرح الاداري
انثر افراح السنين بس تردلي ياحسين
ذوله ولدي اربعتهم فدوه الك يبن الــزجيه
ما يهمني تروح ولدي بس ترد ســــالم إليه
ياحبيبي انت تدري اغله من روحـــي عليه
من اشوفك انسه همي ودنيتي تصبح زهيه
يا أمل دنياي تفجعني برحيـــلك
يبني ظل وياي وارحمني دخيلك
انطي عمري وهذا دين بس تردلي ياحسين
الدنيه بعدك دنيه ظلــــــمه ولا حياة بلا وجودك
انه خوفي من زمـــاني يا حبيبــــي ما يعودك
يبقه دارك يبني خالي بس عطر يــــبقه لورودك
جنت اسمعك من تصلي الدنيه تسجد وي سجودك
يبقه خالي البيت من عندك حبيبي
ولو رحت ظليت لدموعي ونحيبي
اصرخ بصوت الحنين بس تردلي ياحسين
مودع الله والله بعـــــــدك يرحم بحال الحزينه
انت كوكب يضوي عمري يا امل عمري وسنينه
اتنوّر ارض الغاضـــــــريه وتظلم بعيني المدينه
ابقه وحدي بلايه زينب ولا رقيـــــه ولا سُكينه
والله كلبي احتار وانت الحيريته
ما يطفي النار دمعي لو جريته
تطفي ناري واستكين بس تردلي ياحسين
وياك اخذني المن ابقه يالبقائي مــن بقائك
بعدك احسب بالثواني وانتظر لحظه لقائك
ييمه ييمه اندعيلي لا لتنساني بــــــدعائك
انفجع لو ما تردلي خل اشم ريحــة ردائك
مو سهل فركاك شيصبّر دليلي
يبني واترجاك اصبر تندعيلـي
ارخُص عيوني الثنين بس تردلي ياحسين
