اخفي الدموع وكافي تبجين يمه لوداعي بسج لا تنوحين يمة
زينب وراج مصيبة حسين يمة
****
خلي ايدج فوك اديه زينب وصدي عليه
لحظة نامي فوك صدري شوفي طيف الغاضرية
يمة ادري لو غفت عينج على كسر الضلع
بنومج تشوفين اخو بالطف وريده ينكطع
يالحبيبة الغالية وصوت الحوافر ينسمع
نامي وتشاهد عينج الطيف زينب منحر اخوج يكطعه السيف زينب
اسم الله اكولن من تفزين يمة
****
اتصبريني لو اصبرج والمصيبة تحني ظهرج
يمة زينب لا تخافين بكربلا لازم احضرج
ما اعوفج وحدج احضرلج ودمعي يسح
اثنينه نكعد سوة ونشوف اخيج ينذبح
انتي داوي جبهته وانا اجر بيدي الرمح
اتلمينها ضلوعة الهشيمة بيدج تطفين جم خيمة وية خيمة بيدج
عالتل اسمعج من تصيحين يمة
****
باقي جسمه انا اجمعه وانتي دوري وين اصبعه
يموت ظامي وانا اجري فوك نحره دمعه دمعه
ينسلب جسمه ويظل عاري على وجه الثرى
بدمعي وبدمعج يزينب كون نغسل منحره
نوكف نفييله عن حر الشمس يالطاهرة
ام واخت ونشوفه مكطوع راسه بيد الشمر عالرمح مرفوع راسه
بجفوفج لوجهج تسترين يمة
****
عندي حيرة شلون حيرة والسبي محنة جبيرة
ابقى يمه وياج اروحن من يكودونج اسيرة
ضلوعي انا مهشمة منهو اليصعدج عالهزل
ابقى الطم عالوجه لمن يجتفوج بحبل
اندب بصوت الحزن يابالفضل يابالفضل
اصرخ يبوفاضل يعباس وينك زينب تره ماعدهه حراس وينك
واذكر الراية بلايه جفين
****
من تروحين يالوديعة صوت اسمعه من الشريعة
يمة يمة سامحيني فاطمة جفوفي كطيعه
انا اظل يم الجسد وانتي تروحين بغرب
يمة يلجمني الضلع كلما متونج تنضرب
راح اموت ودمعتي لمصيبتج عالخد تنصب
خلصت ييمة من الالام روحي بين النحور وغربة الشام
من الظيم انا ادري تموتين يمة
