حركي الكلب اكثر بعد هزي المهد وتصوي بيه الولد هزي المهد
ما يرهم لجرحج ضمد هزي المهد
***
علي صوتج بالبجي محد يسمعة راح ابنج يالرباب بلاية رجعه
والسهم بعده بوسط نحره شيطلعه صغير جف ابنج ولا يقدر يشلعه
بعده السهم لاوي ركبته ولا طلع بعده السهم من منحر ابنج ما شبع
بعده السهم ما يقبل يعوف الجسد هزي المهد
***
صيحي يم الطفل خلي العالم يصيح هذا جان اصغر شهيد ومنحره يسيح
راس ابنج عالرمح بي تلعب الريح صغير بعده واقل هبه من الهوه يطيح
فوق الرمح عبدالله غافي ومبتسم فوق الرمح شعره يميل ويه النسم
فوق الرمح راسه الصغير شكد صمد هزي المهد
***
يالرباب احتار عقلي وجيت اسئل السهم لو عبدالله يا هو الجان اطول
وحين صابه حرملة هم جنتي عالتل لون جنتي بخيمتج ساعة المقتل
نشفي الدمع عبدالله نام من البجي نشفي الدمع هم وطي صوتج بالحجي
نشفي الدمع ستوه ابنج ارتاح وركد هزي المهد
***
يالرباب وفكي عينج عن هالاحلام ارتاحي مو باجر وراكم سفرة للشام
مات عبدالله وشبع نبلات وسهام وانتي بعدج تندبينه يالولد نام
ابنج غفه وتروى من فيض الدمه ابنج غفه بحضن الزجية فاطمة
ابنج غفة وغمض جفن عينه برغد هزي المهد
