خوية هم ارجع والاكيك واكعد كبالك واحاجيك
من اسولف صوتي ياذيك يالعفتني
**
راجعة بكلبي سوالف مال اسيرة رافكت ذباح اخوها ديرة ديرة
خوية جيت وياك مهيوبة واميرة شلون اروح وية الذي ماعنده غيرة
اليوم اجيت ارد اكعد وياك بلا شمر ارد ابجي وانعاك
كلي وين من ارجع الكاك يالعفتني
**
عالتراب دموعي تنزل ها يغالي مدري ابجي عليك مدري ابجي على حالي
عذبتني بغيرك سياط الليالي عالجرالي شلون اسولف عالجرالي
خوية من ضربوني الارجاس صحت لو موجود عباس
شوف بيه شسوت الناس يالعفتني
**
اخ يا عباس من دورة زماني ذبني يا خوية بمكان المو مكاني
الشام ذابحني ولهسه منه اعاني جانت تمر بسنة هاي الثواني
حيف يا عباس اي حيف تصد علينه عيونهم سيف
انا مدري بصدك لو طيف يالعفتني
**
راح اجيك احجيلك الي صار بيه والمصايب بعدك المرت عليه
خوية مهظومة على الصار برقية طفلة ماتت بالغرب ما بين ادية
بين اديه وقلبي محتار غسلتها وشفت اثار
من الحبل والسوط والنار يالعفتني
**
راجعتلك انزف عيوني على قبرك شلي بعيوني البعد لا ما تنظرك
كلبي يعتب خوية من ضيمة ويعذرك بيك اصبر دمعتي وبدمعي اصبرك
صوتي ذابل بيش اناديك خاف من تسمعة ابجيك
كاعدة وبدموعي احاجيك يالعفتني
