من گلُب مهموم .. تندِب الزهره

يالحسن تصرخ حزينه .. آيمسموم

**

 والدة وحگها لابنها اتصيح مهمومه

تبچي و توِن ابنِياحه ابونَّه مكتومه

 مات ابنها المجتبه ابلوعاته و سمومه

اتنادي من حرگة گلبها و دمعه مسجومه

يالحسن هليوم .. أهمل العبره

والذي ايواسيني وينه .. آيمسموم

***

 نفِس ذيچ الگوم كلها ابيوم عصْروني

بالغدر دسَّولك السَّم بيك فجعوني

 مثل وجهك وجهي ذابل منخطف لوني

و الذي سمَّوك يبني ابضلعي صابوني

ابچبدِي المالوم .. تلتهب جمره

اشهالمصاب الحل علينه .. آيمسموم

**

دهرك ابآلامه والهَّم منَّه لاگيته

بالنوايب و الرزايه ابلوعه عانيته

.احزام صبرك بالشدايد إلها شدِّيته

و بالأخير السّم جرعته ابصبُر گاسيته

و ارحلِت مظلوم .. و حسرتك حسره

ابگلبك وچبدك دفينه .. آيمسموم

**

 و الفجعني امن انحمَل نعشك يشيعونه

اتجمِّعت أهل الحقد بسهام يرمونه

 جسمك امن الدفِن يم جدك يمنْعونه

وانته أوله اويه النبي جسمك يدِفْنونه

صوِّبوك اسهام .. زمرة الغدره

و گلبي بيك امصوِّبينه .. آيمسموم

**

. گبري مخفي و إنته يبني گبرك امهدَّم

من أشوفه اويه الأرض متساوي أتألَّم

. وسَف نورك نور الهي و مرقدك أظلم

اندعيلك ينتقم لك ربك الأعظم

گبرك المهدوم .. ايهيِّج الذكره

ليش گبرك تاركينه .. آيمسموم

**

 هذه يوم امصابك و يم گبرك اتعنَّه

و الذي ايروح البقيع و يسمَع الونَّه

هذي ونْتي اعليك اونها ابعبره و ابحنَّه

و الله يالمسموم نوحي ما أمل منَّه

ما أمِلّ النوح .. و جرحي مايبره

و گلبي ما يهدأ أنينه .. آيمسموم