يارقية انا امج جيت اضمج بالصدر
وجبت من طيبة كفن يابنتي وجبت السدر
نظرت الطفله الى الزهراء وتهل الدمع
ليش يمه يابتولة تمشي محنيه الضلع
وليش في خدج علامة وكنه خدج منصفع
وليش محروقة ثيابج والدما منج تخر
هالعلامة الي بخدي بيده لوعني اللعين
وكسر ضلعي ونزف صدري واثر تسقيط الجنين
انا مثلج بعد ابويه احرقو داري الظالمين
وبقت نار الدار تسعر حتى وصلت للخدر
بس دقلي لي يابنتي شلون جدمج منجرح
وبعدح صغيرة يايمه وجفن عينج منقرح
كنك اسهرتي الليالي يمه لطلوع الصبح
وصوتج المبحوح يابنتي وصلني للقبر
يمه يازهراء ابويه حسين ا جاني بالحلم
وماشفت له راس بويه آه بس شفت الجسم
والجسم شفته مصوب مدري يمه بكم سهم
وصار يكلمني بحنانه اسمعت صوته من النحر
وبالخرابة صرت اصرخ بويه ليش اتأخرت
جاب راسه ابن الدعية يازكية بالطشت
لاكن اضراسه اللولو بالقضيب تكسرت
وجبهته دمها تسايل وصوبوها بالحجر
بالدمع شبكتها فاطم وصارت اوياها تنوح
يارقية جيتج انا اوياج لوليدي بروح
وبمدامعنا يابنتي نغسل ادموم الجروح
وخيج السجاد يحيب الراس ويرده للنحر
روحج اويايه تروح ويظل جسمج بالغرب
بديرة الشامات قبرج وبيه زوارج تطب
ولو اجو عندج بحاجة لاتردين الطلب
اقضي حاجتهم يابنتي وزيحي عنهم كل كدر
