سمعتك من صحت عطشان يا جدّي .. يخويه آنه الحسن رد ونزف چبدي
لوّن بالموت مسموح .. أجي وأحضر يمذبوح
يخويه آنه الحسن رد ونزف چبدي
...............
يلوحيد وهلك عالغبرة صرعه وينك خويه وينك
يروح الحسن من صيحتك أنعه وون ويه ونينك
سهم گلبك أجيتك ارد أطلعه وأحسّن دم جبينك
واجيبن ماي من كوثرالبضعه وأرويك وأعينك
لهسه دموعك الطاحن على صدري .. أحسهن يوم حاضنّي وخلص عمري
تشوف الطشت وتنوح .. أجي وأحضر يمذبوح
يخويه آنه الحسن رد ونزف چبدي
...............
وين الچان طوله يرهب الگوم وين الگمر وينه
لمثل هاليوم حيدر ضمّه واليوم حمّاي الظعينه
شلون اللي فگد چفّين ويگوم أخونه مگطّعينه
عيونه مصوبات وراسه مهشوم ويسراه ويمينه
بعد ياهو اليجي وألگمرعالغبره .. فوگ السم عليك بچبدتي جمره
تعالج انته بالروح .. أجي وأحضر يمذبوح
يخويه آنه الحسن رد ونزف چبدي
...............
يريت أگدر أجيبن طاسة الماي واطفّي نار چبدك
يهون السم عليه ويشفه كل داي وسنّدلك وأگعدك
مثل ما سندّتلي وچنت وياي تضمّدني أضمدك
أضمّد كل جرح وجروحك هواي وظل كاعد بسدّك
أظل گاعد وغسّل وجهك بدمعي .. يمن فدوة لظلعك ينكسر ظلعي
بچبدي لفدي الجروح .. أجي وأحضر يمذبوح
يخويه آنه الحسن رد ونزف چبدي
...............
مثل يومك ابد مابيهه الأيام ولا تحصل رزيه
ولا صارت مثل هايه بالأسلام يريحان الزچيه
عگب موتي ولتني الگوم بسهام متت واحمل أذيه
لاچن موذبيح وفاگد الهام يلنحورك جريّه
صحت عطشان وانته تنزف بدمك .. تمنيت آنه حاضر وانذبح يمّك
وسيف الطاغيه ايلوح .. أجي وأحضر يمذبوح
يخويه آنه الحسن رد ونزف چبدي
...............
صحت عطشان يا جد واسمع ونين وآنه بحيطان گبري
نزف گلبي دمه ياخويه يحسين ما كف مني دهري
يالجسمك طريح بصارم البين وراسك وين مدري
كون انطيك عمري ياضوه العين لونّه باقي عمري
شتفيد اللّون والچفن غطاني .. وأنته بلا چفن هالأمر أذّاني
وأشيلنّك عله اللوح .. أجي وآحضر يمذبوح
يخويه آنه الحسن رد ونزف چبدي
..................
