فارگوني ** اهلي واحبابي وخواتي
ودعوني ** راحت وياهم حيــــاتي
ياهو البعد يبرالي ** والعله شلت حالي
********
فاطمه اّنّه العليلـــــــــــه انعه وحدي
ما بگه واحـــــــــد الي من اهل ودي
عيوني شافت هالضعن باحزانه يحدي
گلبي صاح بلوعته يحـــــــبابي ردي
وسفه راحت ** غابت اقمار الهواشم
روحي ناحت ** من مشه ضعن الفواطم
بالفرگه طگ دلالي ** والعله شلت حالي
***********
شنهي حال الطــفله لو فگدت اهلهه
بالسفر ضاع الفرح منهه وامـــــلهه
روحي من كثر الهـــضم زادت عللهه
دمعتـــــــــي صارت دمه تنزل وهلهه
دومي ابچي ** والقهر هدملي حيلي
ويامن احچي ** مابگه واحد خليلي
راح بسفر دلالي ** والعله شلت حالي
********
مثل شمعه اصبحت مُظلم ضواهه
روحي ورده ذابله ومحد سگاهه
عنّهه شح الماي ماتمطر سماهه
البين رافگهه بحزن والهم لواهه
من اصلي ** ادعي يارب الجلاله
لو تردلي ** والدي وترد عياله
ماادري باليجرالي ** والعله شلت حالي
*****************
داري صارت موحشه وخيّم ظلامي
گمت افز من نومي مرعوبه بمنامي
احچي وي روحي الصده يرجع كلامي
دمعي بالحرگه الهلي يبعث سلامي
عندي لوعه ** بالحشه ملتهبه ناري
دمعه دمعه ** ينگظي ليلي ونهاري
سهرانه بالالي ** والعله شلت حالي
*********
ليلي اظــــــلم صار من غابت بدوره
حالي يشـــــكي حالتي وضيّع سروره
والدي بطــــــــول الوكت يبرالي نوره
گبالي مرسومه صورهم صوره صوره
ياصورهم ** نحمل اياتك نبينه
ياقدرهم ** حكمه مكتوبه علينه
بيهم ربطت اّمالي ** والعله شلت حالي
************
فكري ويه حسين مشدود وكياني
لخوتي وعمي يفيض بحب حناني
يم مهد عبدالله حولتـــــــــه مكاني
ادري روحي تروح لو محد اجاني
ونه تكبر ** تنحب لولد الزچيه
لوتأخر ** والدي تلوح المنــيه
صار النعي موالي ** والعله شلت حالي
