حضري دمعاتج يزينب   الي خفتي منه كرب
وية احبابج بقت بس هالمسية  حضري قلبج يالعقيله لهالرزية   
**
علينا مكتوب القدر وتحتم علينا القضاء   ولازم نسلم امرنا والله يفعل ما يشاء
باجر بنور الفجر يتقسم علينا البلاء    وياية اصحابي تموت وتنسبي وياج النساء
انا واصحابي الضحايا   وكل اهل بيتي سبايا 
علينه اجره هالحكم رب البرية   حضري قلبج يالعقيله لهالرزية
***
حضري يا زينب سواد ثيابج اليوم الحداد    باجر تشوفين شدة تزلزل السبع الشداد
بس سواد الليلة هذي وعينج تشوف السواد  وبس خيام الليلة عندج باجر خيامج رماد  
اليوم هاشم تحمي الخدور    ولامية باجر الدور 
عكب ابو فاضل شمر يحمي الثنية   حضري قلبج يالعقيلة لهالرزية
***
مصايبج امج فاطمة باجر لمن تنزل عليج  حضري يا زينب صبر حيدر ابونه ببين اديج 
وابجي يا زينب لجن لا يسمع الشامت بجيج   ولا تحشمين اخوتج محد تره منهم يجيج
لا تلجمينه بعتابج  وجهي لحيدر خطابج
بينه وبينج تصد تالي المنية  حضري قلبج يالعقيلة لهالرزية
***
لزمي يا زينب على قلبج اذا حان الرحيل  باجر تشوفين يختي الجان عندج مستحيل 
عالرمح راسي يظل  وجسمي بالحومة  جديل   وانتِ عالتل تنظريني ومدمع عيونج تسيل 
عالذي تشوفينه صبري  تلعب الخيل على صدري
وانا تحت الخيل أأشرلج بدية  حضري قلبج يالعقيلة لهالرزية
***