جارى التحميل
استخدم زر ESC أو رجوع للعودة
الوداع يا حبيبي يا حسين
كلمة مني تختصر كل الرواية
باجر احنا ننذبح وانتوا سباية
***
هذي اخر ليلة اني وياج يختي
والذي خافي تشوفينه بنظرتي
باجر تشوفين بعيونج ذبحتي
من اروحن سامحيني وابري ذمتي
حكمة الله استوجبت هاي النهاية
باجر احنه ننذبح وانتوا سباية
***
يختي غطي بجفج عيون اليتامه
لا يشوفون شحصلي من ظلامه
راسي يبقى على الرمح وبلا عمامة
والخيول على الجسم تطحن عظامه
هذي يا زينب تره بس البداية
باجر احنه ننذبح وانتوا سباية
***
يختي باجر من على التل تنظريني
لا تاشريلي وتزيديلي ونيني
ما اجيلج اني كون انتي التجيني
لو وصلتيلي بعباتج ظلليلي
تنظرينه بهالشمس كلنه ضحايا
باجر احنه ننذبح وانتوا سباية
***
لو وصلتوا للذي على النهر واكع
لا تلجمونه وتقلبون المواجع
لا تروحون وتكشفوله المقانع
لا يشوف بخدكم اثار الاصابع
الي شافه من العتب بيه الكفايه
باجر احنه ننذبح وانتوا سباية
***
"خادمة (النجفية )الحسين "
