يا شمس عمري وحياتي فارگتني
وإنعمت عيني يجاسم من عفتني
أحمل آلام ** يبني جسّام
من عفتني
*************
من عگب عينك أضل أصفگ بإديّة ** وأعثر بآهات صبري بكل مسية
كون گبلك روحي تاخذهه المنية ** يا حبيبي ولا عشت للغاضرية
كون ملچ الموت ما خذهه لحياتي
ولا ذبح بيك الأمل وي أمنياتي
ضلّت أوهام ** يبني جسّام
من عفتني
*****************
لو رحت بيتي يضل يوليدي خالي ** ودهري والله ما رحم يوليدي حالي
عيني عاميهه السهر طول الليالي ** أنتظر جيتك يغالي وأغله غالي
ما أظن تنساهه أمّك يا حبيبي
أگضي ليلي بنوح ما يسكن نحيبي
والحزن حام ** يبني جسّام
من عفتني
********************
من رحت عني شتظن هم جرحي يشفه ** لو تظن يبني جمر فرگاك يطفه
يبني أشوفك بالحلم لو جفني يغفه ** أگعد وعالباب أركض كلّي لهفة
هذا إبني هاليدگ هالليلة بابي
أعثر وأنهض وأطيح آنه بمصابي
والعگل هام ** يبني جسّام
من عفتني
عيني ضلّت شابحه لجيّت حبيبي ** لو إجاني تنطفي ناري ولهيبي
ما سكن يوليدي من بعدك نحيبي ** من يداويني ورحل عني طبيبي
ضل جرح فرگاك ينزف من غيابك
وعيني ملّت من دمعهه ومن عتابك
وجفني ما نام ** يبني جسّام
من عفتني
****************
ألف وسفة يبني والله ألف وسفة ** هالحياة إخلاف عينك يبني كلفة
يكبر إبني هالحلم بعيوني يغفه ** وصار عرّيس وردت بإيدي أزفّه
تالي لن بإيدي أزفّك للمنية
ومن دمه نحرك أحنّيهه إديّة
لنهه أحلام ** يبني جسّام
من عفتني
*******************
ليش تمشي عني يوليدي وعفتني ** وللحزن والنوح وآلامي إتركتني
أعجن بحنتك يجاسم مو شفتني ** بحنّة ودموع وألم أمّك تحنّي
لو ردت يبني يجاسم مني حنّة
راح أعجنهه بونيني ونّة ونّة
بنوح الايام ** يبني جسّام ** من عفتني
****************
يبني كل ليلة بحلم أمّك تشوفك ** تركض بلهفة وتحضنك ما تعوفك
يا هله بجسّام يا محله طيوفك ** گوم يبني إستقبل بعرسك ضيوفك
مو گمر هاشم إجانه وهنّه أمّك
وعمّك حسين الغريب بصدره ضمّك
بنص الخيام ** يبني جسّام ** من عفتني