يا دمع اسئل حسين  ذبحوا كباله طفلين  

قارن بين الاثنين
***
ها يبو السجاد والمدمع يصبرك  بالله يا موقف اشد من قطع نحرك
من شفت محسن وكع وانكسر ظهرك  هم شفت عبدالله مذبوح على صدرك
حاضر انت وشفتهم    بالدمع ودعتهم  قلبك اليحوي جرحين  
قارن بين الاثنين  
***
محسن ينادي وضلع امه تكسر  احضر احضر يا علي للزهرة احضر 
وابنك بحضنك يلوج بشدة الحر   ينظر على المشرعة وقلبه تفطر
واكتفى بنظرة احساس  ما يرد عمه عباس
مشرعة وبيها جفين  قارن بين الاثنين
***
ينكسر قلب الاخو اليفكد عضيده  ينهدم صبره اليموت ابنه على ايده
هذا اخوك وانت يوم الطف تريده  وابنك الضامي بسهم كطعوا وريدة 
عينك ششافت احزان  يا دمع يروي عطشان  
عينك تهل دمعتين  قارن بين الاثنين
***
واحد بعصرة وكع وانت نظرته   وواحد بسهم الغدر مالت ركبته
محسن على امه بجى وتسمع حسرته وابنك على الماي ما جفت دمعته
والعطش ويلي ماذيه  حرمله بسهمه يرويه
يا حسين الالم وين  قارن بين الاثنين
***
من وكع محسن يحس احبابه عنده  وابنك الظامي يحس بالغربة وحدة
مات اخوك وحيدره يحفرله لحدة  وابنك بقبرك على صدرك توسده
خلي جرحه عالجروح  والذبيح وية مذبوح
لو سألنه على الحسين  قارن بين الاثنين
***
المحسن على الكاع والزهرة تصد ليه  وابنك المذبوح يم زينب تودي
طاحت امه وكل خواته طاحن عليه  يا طفل منهم شفت زينب تناغي
عمه ما تنحمل هاي  ميت بحسرة الماي
ناغته وصفكت ايدين  قارن بين الاثنين 
***
واحد بيومه اندفن امه الزجية   وواحد بلاية دفن وامه سبية
ياهو الاكبر يا جرح اكبر اذيه   الجرح بالباب لو بالغاضرية
كل طفل شاهد النار  شبت الخيمة والدار
نارك وهذي نارين  قارن بين الاثنين
***