تمـنيت تجيـني يعباس يخويه
وتغَمضلي عيني يعباس يخويه
تـره حانـت منيتـي ** تعال اسمع وصيتي
-------------------
يبـو فاظـل . انـه زيـنـب . خويه مـن دار الغرب هالصـوت ارفعه
مــر علــيه . ياكـفــيـلي . ياضــوه اعيوني اذا صـوتي تســمعه
الموت اجاني . وتدري وحدي . من تجـيني بالله جيب اوياك شمعه
ادياري ظلمه . وحشه داري . على افراش الموت اختك تجري دمعه
اخـتك واريـدك يعباس يخويه
واريد الَزم ايدك يعباس يخويه
انته ادره ابـقظيتي ** تعال اسمع وصيتي
-------------------
زيـنب اني . وتدري زينب . خويـه تحتاجك ابكـل لحـظه تجيها
عمـري خلص . بالمـأسي . اسئــل اعيوني يســولفلك بچيها
قصتي قصه . صعبه والله . خويه من تلفـيني اظـهرلك حچيها
منها اعاني . ومن زماني . حرمه وشراووهه من فگدة وليها
اســيره وســبيه يعباس يخويه
اشكثر شفت اذيه يعباس يخويه
فگدك هدمم بيتي ** تعال اسمع وصيتي
-------------------
اوصيه عندي . والوصــيه . صعبـه منهـو اينـفذ الدلالي امره
من تجيني . اوياك اخذني . نعشي گبر حسين بيدك انته زَوره
روحي حنت . والظـريحه . حتـى لــو مـيته يبو فاظــل انظره
يدري بـيه . اشگـد احبه . وعلى نعشـي ازيارته ياخـويه أقره
وتناديـله يحسين يعباس يخويه
اجت زينـب الحين يعباس يخويه
يحــماي الحـميتي ** تعال اسمع وصيتي
-------------------
لمن اگظي . وينتهي امري . عالارض خلـيني لاتدفني انـته
ايعـز علـيه . يبـو فاظـل . حسين نايم عالترب ياخويه شفته
اخيول اميه . اتدوسه هيه . مــو بديه ابكربله من انـه عفته
اسـرونـي . وتدري انته . وصاحو العـباس اسرناهه اخــته
الي الموت تمنيت يعباس يخويه
ولاعـنكـم امـشيت يعباي يخويه
ويـگلولي انـسبيتي ** تعال اسمع وصيتي
-------------------
هيه موته . الف مــوته . والله ياخـويه امـوت ابكل مسيه
شذكر اني . امن السباني . السوط لسه ابمنتي اثاره عليه
وطفله عندي . اتريد ابوهه . موتتــني خويه من ماتت رقيه
مابـقـالي . واللــيالـي . هَـدمـت حيـلي مـصايب ال اميه
نوايــب مصـايب يعباس يخويه
الگلب منها ذايب يعباس يخويه
جـرح طفـكم هويتي ** تعال اسمع وصيتي
-------------------
ياكفيلي . ادفني بيدك . ولفني خويه ابرايتك لو چفـنتني
بيهه عطرك . انه اشمه . لسـه انـه اتذكـره من اكـفلتني
امنــياتـي . ياحــياتي . لون انته الگــبري خويه وصلتني
من تـنزله . جسمي بيدك . هم اودعك خويه وانته ودعتني
من اتـهل ترابي يعباس يخويه
تره ايخف عذابي يعباس يخويه
وتخلص كل أذيتي ** تعال اسمع وصيتي
-------------------
