جينه نعزّي حيدره === ولزينـــب إنواسيهـــا
ــــــــــــــــــــــــــــــــــــــــــــــــــ ـ
جينه نعزّي المُرتضه == والمُصطفــــــــه هادينه
نحضر دفنها الشافعــه == ويّه علي والينــــــــــه
نسمع حنين المُجتبـه == وإحسين تجري عينه
ندري الوديعه الطاهره == كســــــر الضلع ماذيها
ـــــ
جينه نعزّي المُصطفه == وإﻧﮔلــّـه يامولانـــــــــه
بعدك نسوها فاطمه == وإم الحسن ولهانـــــه
وإحنه ننادي المنتظر == والمنتظر ماجانــــــــــه
عجّل إلهي بالفرج == والطلعـــــه منتظريها
ـــــ
جينه نشارك بالحزن == ننصب مآتم جينــــه
لمصيبة الزهره إبدمــــه == كل شيعي تجري عينه
وإنشارك الوالي علي == وإنساعده وإنعينـــــــه
زينب نشاركها العَـــزَه == ندري الألم حل بيها
ــــــ
جينه إبحـــــزن ما ينمحي == نحضر وداع الزهــــــــره
وإنشوف والينه الوصي == حيدر علينه إو جمــره
وإنشوف زينب حايـره == حسره إبأثرها حسره
وإحسين ﯾﺑﭽــي والحسن == وإمهم مضت تاليهــــــا
ــــ
جينه إبجرح ما ينتهي == نَزْفَـــه ولاعبراتــــــــه
بس الأمل يشفي الجُرح == من يظهر إبراياتـــــــه
يوم اليجي إيحين الفرج == ويهل دِمَه دمعاتــــــــه
ولطيبه نمشي إبموكبه == وأمّه الأبي إيناديهـا
ـــــــ
جينه إو أبد ما ظل صبـر == يبن الحسن بينه الداي
نسمع تُراب الطاهره == أم المصايــب مولاي
إكشف يمهدي الشيعتـــــك == ﮔبر الزﭽيّـــه إﻠﺷﭽـّاي
وإبني اﻠﮔبر يالمنتظــر == وأمّك سُوَه إنهنّيها
