بوية مااحمل مرار مصابك
ريت غابت روحي قبل غيابك
___
انا روحك وانا قلبك فاطمة
دمعتي لفقدك اهلنهه دمه
عكبك بعيني حياتي مظلمة
صوباني بالدليل مصابك
___
رحت عني وكصت بيه النايبة
جمرت احزاني بمهجتي لاهبة
راح اظل مدوهنه ومدولبة
بوية وعليه تجور اصحابك
___
ادري بعدك ما اكف مجرى الدمع
على هظمي الكوم راحت تجتمع
بوية واليبسمار ينبت بالضلع
لمن يعصرني اللعين ببابك
___
ادري امرك عكب عينك ينعصي
وادري بس الصبر منهم مخلصي
لا وصية اليحفظوها ولا وصي
ويحركون بباب داري كتابك
___
لا ضلع يسلم ولا يسلم طفل
على عيوني بيده يسطرني النذل
والهضيمة علي يجتفونه بحبل
يوكفون الظالم بمحرابك
___
آه يا بوية شعظم هظم الكلب
يمنعوني جي انوح وانتحب
فدك من عندي خذوها بالغصب
شرد اقول وشحجي وي غصابك
___
قطعوا الشجرة الجنت يمها استجن
عفت داري وسكنت بيت الحزن
ليل ونهاري على قبرك اون
سلوتي صارت بشم ترابك
__
بعد ما ظل لي عكب عينك امل
وانتظر يا والدي يوم الاجل
اشتكي من فلان وفلان شعمل
لازم وياهم تصفي حسابك
____________________
