عله أنياگ الصبر يابويه ردينه -- أدوّر وين گبرك صاحت أسكينه
--
عله أنياگ الحزن والنايبه والهم -- سكنه عودّت يحسين لرض الدم
يتيمه لا أخو لاأبو لاضل عم -- بويه اتصيح وين الگبر دلينه
--
يبويه النوگ ردت وبمحاملها -- ودمعات اليتامه اعليك تهملها
أنه سكنه العزيزه ومن بعد الها -- يبويه حسين گوم وشوفنه اشبينه
--
يبويه سكنه آنه وجيت بحزاني -- تعّبني اليسر ماشوف خلاني
عزيزة گلبك آنه شلون تنساني -- يبويه ومن بعد عينك يبارينه
--
يبويه حسين أراويلك جرح چبدي -- أبو غيرك يبويه حسين ماعندي
عسه سالم يبويه وريتني ابلحدي -- ولاعگبك عدوك وليه يولينه
---
عدوك لارحم عنده ولا أمروّه -- وگلبي ابنار فگدك بويه يتچوّه
تمنيت السمه فوگ الارض يهوه -- ولا شامت على سكنه يصد عينه
--
بنت حسين أگلهم روعّوا حالي -- كل لحظه وجابوا راسك أگبالي
أشحال البت يبويه المالها والي -- ابثوب أسود تخلص العمر وسنينه
--
