الله أيساعد گلبه وصبره ---- شلون أتحمل هذا اليجره
بـالطـف ينظر للأجساد ----- شلـون أتحملها السجــاد
الله أيساعد گلبه وصبره
****************
على جروحه عـبر ودموعه هماله
يحامي بروحه گام ويحرس أطفاله
أبد ماحاسب حساب الجــره أبــاله
يشاهد أهله گدامه أعـــله هالحاله
من ايشاهدهم عالغبره ---- نار أتشب بگلبه وحسره
من فعـلة ذوله الأوغاد ---- شلون أتحملها السجــاد
الله أيساعد گلبه وصبره
**************
عبرها بكل صبر من شاهد النيران
تلهب واللهب ماخله أي صيــــوان
تتراكض أطفاله بوحشة المــيــدان
وبلوعه يشاركها بصدى الأحــزان
شاف النار أتشب وتسعر ---- بخـيـمـها ولازم يتصبر
من راحت ذيج الأمجـــاد ---- شلون أتحملها السجـاد
الله أيساعد گلبه وصبره
*************
تصبر عالجره والشافه بعــيــــونه
رغم جرحه البقه ومافارگ أضنونه
يحيطونه گبل أهله يحـيـطـــــــونه
وهسه أيصيح لاچن مايسمعـــونه
بس أطفاله ونار أخيمها ---- يجمعها وشلون أيلمها
نار بنص گبله وتــــزداد ---- شلون أتحملها السجاد
الله أيساعد گلبه وصبره
**********
يشاهـد عـمته وحسرتها واللوعه
بگلبها المنكسر وشلون مفجوعه
يصيح العـمـته بآهــات مسموعـه
أسمعـيني يعـمه وتهـمل أدموعه
ياعـمه ومن أتجمعـيها ---- أطفالي ويمچ خـلـيــهـا
لاچـن نظــرات الجــلاد ---- شلون أتحملها السجاد
الله أيساعد گلبه وصبره
************
بعــد رحلة عذابه وصبره والمحتوم
رحل والدنيه تعرف من رحل مظلوم
گضه أسنينه بحزن وهموم يابوهموم
ختمها وچبده يتگطع أثــر لسمـــوم
راح وآهاته بنص روحه ---- راح وماتنعـد جروحه
من أيظلمون الأسيــــــاد ---- شلون أتحملها السجاد
الله أيساعد گلبه وصبره
*************
