علي فين يا بلدنا قوليلنا. ماشيه ووخدانا
يا تري انتي فعلا بلدنا. واللا انتي سجانا
طيب بتهمشينا ليه. احنا عملنا فيكي ايه
طب بتخلفينا ليه لما انتي كارهانا
قافله في وشنا بابك. ودايما زايدة عنادك
هو احنا فعلا ولادك. واللا انتي شاحتانا
حطانا جنب السور. ومسكنانا جوه قبور
وبتكشري لما نثور. وبتعملي زعلانه
الفقير فيكي مظلوم. ومن حقه محروم
وطاير من عينه النوم. ونفسيته شقيانه
إبن القاضي قاضي راسخ عندنا م الماضي
والغلبان ساكت وراضي ماهي حالته تعبانه
الكوسةوالمحسوبيه والرشوه بالورقه ام ميه
فعلا نسينا الانسانية ويمكن هي اللى ناسيانا
يا بلدنا خفي علينا. وبالرحمه بصي علينا
د اللي فينا مكفينا. وعمايلك علطول قارفانا
حرية فيكي مفيش. وعدالة متلاقيش
ومكتوب علينا نعيش. بالظلم والإهانه
وعلي فين يا بلدنا قوليلنا ماشيه ووخدانا
