‫(عشان بحبك) من وحي الصورة

واكل رغيفك رمل وأبلع لك زلط
وأقف له يوماتي يا غالية طابور

يخلص عمري في رغيف وانبوبة
وعليهم في خناقة اموت ..
ووفاتي شهادة مكتوبة ..ومختومة
بختم ....في الحياة لم يصبه الدور

من نيلك الشهد سقياهم
وانا .....السم دايب في المر سقياني
عشان بحبك
عشان بحبك وتقولي لي اصبر .. وانا الصابر
بس مليت .....له ..مش شاااااايف اخر

لما باشوف
كروش مليانة علي أخرها
مش لاقيه حزام علي مقاسها
وازماتك حـِزمـِة تكسر اللي مالوش ظهر
....حزامها مشدود علي بطونها
وحبال كدب مهرية فيها متشعلق
و ازماتك حبالها علي رقبتي مفتولة .... خنقاني

اقول أخرج من همي أتمشي
عشان أنسي
اتكعبل ف لحمة مرمية
ولااااااادك
عل ارصفة شوارعك
وتحت كباريكي نايمة
بتعاني

بترمي ولادك . بترمي لحمك
لكلاب السكك تنهشه بعظمه ؟؟؟
وانتي ولا همك !!!!
وب الهم محوطاهم ...محوطاني

ووشك للغني بيضحك
ومنك الجفا شايفه
و اقول الآه
الاقي ودنك عن آهاتي ...من زمن ..طرشه
وعنيكي .. لدموعنا مش شايفة

فلازم أقول وأحكي وأشكي لك
والا عشان أعجب لازم أكون أخرس
وبالوجع بآهة ماأنطقشي
مش طاااااايق
مش طايق حقي فيكي ماأطلبشي
وأسيبه للغيلان تاكله
...عايزاني جبان؟؟؟
والا عبيط والبس العمة ؟؟
والا عشان يقولوا شريف اعيش صايم عن الفرحة
طول الدهر وفي الحياة ازهد
و ابيع كفني ...واندفن عريان ؟

ماطبيعي اللي بيطبل للحاصل حاجة م الاتنين
يا متهني ومدفي وشبعان ومحلي
او من كنوزك بيغرف و يسرق الغلبان

ما تفوقي بقي كده وتسمعي مرة
وتحسي
السوس بينخر في عضمك
والفئران فيكي بتقرض
وخيرك شافطه حيتان
والا انتي في غيبوبة مش حاسة

اسمعيني ياسمرا يا أم قلب أبيض
ها ينفضوكي ويسبوكي ع الحديدة خالية .....حيطان

وساعتها علي حيطان مايلة هاتتسندي
حيطان قلبي اللي شرخت
وعزيمة كانت حديدها صلب
من دموعنا وطناشك
خلاص صدا

بارومة مسكت فيه
وانتي مش سائلة
رغم انه محل اقامتك
وملكك إنتي
وملكك انتي
وانتي فيه ساكنة

الحقي داووي قلبي
الحقي بسرعة
الحقي قلب حبك مووووت

قلب عليكي خايف
لَ سقفه علي راسك يقع
قلبي خلاااااااص م التعب آيل لسقوط

( ذ.حمدي صالح )