قصيدة (( وجع الغربه )) .................................................. بقلمي / رأفت يوسف
الغربه حته من عذاب .........
سفر هموم وسنين تروح 
وشوق بيقتل في الغياب 
تشتاق لأهلك والوطن 
يحن شوقك للتراب ، واخدك حنينك ......
تفتكر اللمه وسط أحباب صحاب ،
وتعيش وحيد وتزيد همومك 
الغربه صحرا غيوم ظلام 
جواك آنين حزن معلم ع الجبين من غير كلام
بينك وبين الفرح دايما فيه خصام .........
محتاجه نفسك للسلام
حضن الوطن للنفس بيت صفا وسكن 
أيام تطول بالعافيه علي ماتعدي يومك ،،،،،،،،،،،،،
الغربه سجن لروح بيحملها الجسد 
سجان ملازمك ليل نهار وياه تروح 
تتمني ترجع للوطن ........
لفجر آسرك ياغريب تترجي يبقاله ظهور
وتشوف في وسط الضلمه نور،
وتراب بيستني رجوعك،،،،،
شنطه سفر وسنين وجع 
في الغربه علي ظهر أنكسر ،،،
أبني مفارقه عشان يعيش 
اللقمه للغلبان في بلده خلاص مفيش 
دمعه ولاده ع الرغيف مابتتنسيش 
أبقي أفتكر أزاي أبوك شاف العذاب
علشان يصونك،،،،،،،،،،،،،،،،،،،،،،،،،،
خليك فاكرني ، عمرك حياتك 
في الغربه شوقي إليك قاتلني 
أنت وخواتك،،خليك ملازم للوطن ،
حبه بذاتك أياك تفرط في التراب 
عَمّر بإيدك وبإيدين كل الشباب ،علشان ولادك 
تمن البعاد الي أتكتب هايكون وجودك،،،،،،،،،،،،،،،،
حب الوطن 
الغربه قبر بدون كفن ،
أصنع في قلبك للوطن حضن وسكن 
عَمّر بايدك كل شئ ،،، الغربه قتلت جوه أبوك قلبه البرئ 
وادعيلي أرجع من هناك ، قبل ما عمري ينتهي 
باتمني اشوفك ،،،،،،،،،،،،،،،،،،،،،،،،،،،،،،،،،،
لو يوم قالولك إني مُت ،........
أبنيلي قبري في وسط ناسي 
وازرع عليه صبار وورد
وقولهم : أن سنيني في غربتي لحبكم ماكنت ناسي 
واكتب عليه ... دا عاش غريب ومات غريب ،
وامسح دموعك