بحبك 
قد عُمري الجاي بقولها
قد اللي عدا وسنين بِطولها
عارفه لما يقولو إسمِك
ولا يُخطُر في بالي رسمِك
بحس زي ماكون حبيبتي
السما وبإيدي أطولها
من يوم لُقانا ونفسي أشوفِك ليل نهار
نفسي أكون لك نن عينك ولا رِمشك
زي توبِك زي ضلِك أي حاجه وبإختصار
مستغرباني .. طب أعمل إيه 
ما أنا قلبي عشقِكْ 
وعاشق الكُحله فـ عنيكي 
وفـ إيديكي
لمسة السحر فــ إيديكي 
ولون شفايفك صحاكي فيا 
ولوِن الدُنيا فـ عنيا .. نور ونار
كُل حرف بين سطوري في القصايد
بيوصفك وياريتني قادر أوصِفك
مع إن كُل معني ليا .. عليكي عايد
ده أنا حتي قبل ما أشوفك وأعرفك
حسيت وجودك 
والورد اللي طارح فوق خدودك
لولا الملامه يا حبيبتي
كُنت قطفتهُ أو خطفتهُ
وإنتي كمان مـ الوجود كُنت أخطفِك
ياريت من زمان قبل الزمان كُنت أعرفك