بقلم-محمدحمدى السيد
امتحانات الدورالأولانى خلصت من يومين!
وامتحانات الدورالتانى يا حسين على الأبواب...
ومنتش فاهم فى كتاب الفيزيا غيرفصلين!
وبقيت الكتاب مستواك فيه هباب..
كنت سمعت كلام صحبك حسنين!
قالك: "بلاش تخش علمى وخش أدبى يا حبيب"!
"لانك فى الجغرافيا والتاريخ واللغة العربية من المتفوقين"!
رديت وقولت :"بابا نفسه أبقى طبيب"!
يا حسين البلد فيها بدل طبيب الأسنان اتنين..
والمهم تخش اللى انت فيه متفوق وله حبيب..
كنت زمانك يا حسين فى الأدبى من المتفوقين..
وكنت زمانك دلوقتى مخلص امتحانات وفرحان وبتتعشى كباب!
صارت قصتك يا صحبى فى البلد عبرة للمعتبرين..
يا ولاد الحلال خشوا اللى انتوا فيه متفوقين علشان ايامكم تبقى عناب!
وبلاش يا ولاد تعملوا زى جاركم حسين وتبقوا من الخسرانين..
صار مستقبله وحاضره وماضيه عذاب فى عذاب فى عذاب!!!