بقلم - محمد حمدى
بوحة : تل مطيور،بقى حاجة مقرفة خالص،يا سيد الناس !
المعلم فرج : عندك حق والله،يا بوحة !
بوحة : 24 فدان مليانين زبالة،يا معلم فرج !
المعلم فرج : زبالة مركز دسوق،ومركز فوة،بقى !
بوحة : أومال مصنع تدوير القمامة،اللى بيقولوا عليه ده هيتعمل إمتى، يا معلم ؟!
المعلم فرج : فى المشمش،يا بوحة !
بوحة : يعنى بعد شهرَين،تلاتة !
المعلم فرج : هاهاهاها شهرَين،تلاتة ؟!
بوحة : ما هو المشمش هيطلع بعد شهرَين،أو تلاتة،يا سيد المعلمين !
المعلم فرج : أنا عندى فكرة حلوة قوى،يا بوحة،بخصوص تل مطيور !
بوحة : قول يا أبو الأفكار،والمفهومية؛دا المنطقة إنتشر فيها أمراض،وبقت تقرف خالص،يا سيد الناس !
المعلم فرج : إيه رأيك لو الزبالة إتعملت على شكل أهرامات ؟!
بوحة : أنا مُش فاهم حاجة،يا معلم فرج؛ إيه علاقة الأهرامات بالزبالة اللى فى تل مطيور ؟!
المعلم فرج : إحنا إشتكينا كتير قوى مِن الزبالة اللى فى تل مطيور،صح ؟!
بوحة : صح؛ دا حتى محمد حمدى،كتب أخبار،ومقالات عن المشكلة دى،لكن لا حياة لمَن تنادى !
المعلم فرج : طالما مفيش فايدة؛فنعمل الزبالة على شكل أهرامات .
بوحة : تقصد نعمل أهرامات زى الفراعنة،يا سيد المعلمين ؟!
المعلم فرج : عليك نور ! حتى يبقى شكلها حلو !
بوحة : بس أهرامات الفراعنة مِن الحجر !
المعلم فرج : طب نعمل إيه بس،يا بوحة ؟!
بوحة : عندك حق،والله،يا معلم فرج !
المعلم فرج : يعنى إنت معايا يا بوحة،فى الموضوع ده ؟!
بوحة : أنا معاك فى الموضوع ده،وكل المواضيع،يا سيد الناس !
