بقلم - محمد حمدى
رياض المنفلوطى : هى الفرقة عملت إيه مع سيدى سالم،يا أدهم ؟!
أدهم : ما عملتشى حاجة،يا فندم !
رياض المنفلوطى : إزاى ما عملتشى حاجة ؟! إحنا خسرنا،يا أدهم ؟! صح ؟!
أدهم : إحنا جبنا فى نفسنا جول فى الدقيقة 65 !
رياض المنفلوطى : يا نهار،أصفر؛دا إحنا كده إدينا أمل لسيدى سالم،يا أدهم !
أدهم : بس والله إحنا كنا أخطر،دا إحنا ضيعنا إنفراد فى الشوط الأول،يا أفندم !
رياض المنفلوطى : هو محمود هلال لعب ليبرو ؟
أدهم : لعب ظهير أيمن !
رياض المنفلوطى : دسوق هبطت رابعة رسمى،يا أدهم !
أدهم : لسه فاضل بيلا على أرضنا،وسخا على أرضها،وأسبوع راحة؛لو أخدنا الست نقط مُش هنهبط بإذن الله !
رياض المنفلوطى : دا فى العنب؛بقى الفرقة دى اللى هتفوز على بيلا،اللى مُتصدرة الجدول ؟! اللجنة الثلاثية بيديرها واحد رابع،يا أدهم !
أدهم : والله اللجنة الثلاثية شغالة على أخرها،يا أفندم !
رياض المنفلوطى : اللجنة اللى دفعت فلوس للاعيبة المُتمردة،وجابت بالباقى صفقات هتنزلنا درجة رابعة !
أدهم : شفتك رفعت خالص لفوق،يا فندم ؟!
رياض المنفلوطى : أنا شفتى رافعة لفوق طول الموسم مِن قلة النوم،والتفكير،يا أدهم !
أدهم : بعد ما تاخد الحقنة هتنزل،يا فندم .
رياض المنفلوطى : ساعة واحدة،وهترفع تانى !
أدهم : الحقنة المرة دى،مُعتبرة،سعادتك .
رياض المنفلوطى : أنا مُش عارف أبوس طول الموسم ،يا أدهم !
أدهم : بس مُش عيب لما نهبط رابعة .
رياض المنفلوطى : يا نهار بامبى مسخسخ،دسوق اللى كانت عاملة رعب فى المنطقة،تهبط رابعة،وتلعب مع العِزب !
أدهم : موسم واحد وهنصعد تانى،يا فندم .
رياض المنفلوطى : دا فى المشمش،يا أدهم؛دا لو هبطنا رابعة مُمكن ننام فيها زى ما نمنا رُبع قرن فى التالتة !
أدهم : إن شاء الله هنفوز على بيلا، وسخا !
رياض المنفلوطى : أفكرك إما نصعد بيلا لتانية،ونخلى سخا تستنى فى التالتة؛إحنا هنخسر مِن بيلا،ومِن سخا !
