آخــــرتــهــــــــا
*********
أنا وانت
بننزف من نفس الجرح
وبنضحك على نفس النكتة البايخة
وبنستنى القهوجى ييجى
ويجيب الشاى الكوبيا مع الحلبة
وبييجى الظابط
ويكمل باقى النكتة
فى مكتب الشرطة
تاخدك منى
ضحكة حضن البنت الواقفة
قدام فترينة لقمصان النوم
وانت بتحلم
تسرق من شفايفها السكر
لاجل تحلى الحلبة زيادة
وانا واقف مصلوب كالعادة
فى وش الحيطة
جوة الزنزانة العيانة
بضغط الدم المـُزمـِن
وتصلب فى الشرايين
لسـّاك راقد وبتضحك
وبتتفرج على آخر شهقة بتخرج
منى ..على آخر لسعة كرباج
ترسم على ضهرى
سكة موت صوتى
وانا كفى بينده
على كف إديك
لاجل ما يسحب من شرايينى
طعم التلج
ريـحــة الموت
ولقيتك وعنيك مفتوحة
مش بتشوف
وانا باتكعبل
فى خريطة رسمها الكرباج
على ضهرى
أتاريك زيى
متكعبل فى الشهقة الباقية
حشرجة النفس المتكتف
فى النهجان
آخرتها يا صاحبى
نترمى على أرض الزنزانة
غطونا بورقة جورنان
والبنت ...ايــّاهـــا
لسّاهـا
مصـلوبــة قدام الفترينة
وبتتفرج ع القمصان
......
بــقــــلــــم ا لـــشــــــا عـــــــــــر
أ بــــــو عـــمــــــــا ر ا لــــمــــصــــــــــر ى
التعليقات
Abdelazeim Alahwal مساء الخير ياحبيبى يافنانمساء الهنا لقلبى أنا
تسلم تسلم تسلم وتتهنىإلغاء إعجابي · رد · 2 · 2 ساعة
الشاعر أبو عمار المصرى ....مساء الابداع ... يا شاعر
جمعة مباركة عليك وعلى أحبائك بإذن اللهإعجاب · رد · 2 ساعة
امل الغد عبق نرجسي يسطر بعذوبه وجمال يعانق السماء كجمال الانتقاء
على الطرح الراقى والموضوع الصادق يسلم يراعك
اخي ابو عمار المصري
إعجاب · رد ·
