الشاعر أشرف ناجي .. أقصى حدود الشوف

الشاعر أشرف ناجي .. أقصى حدود الشوف

ضلك عمود كهربا ...

بيونس الشارع

المجروحين م الندى ..

والهربانين م الخوف

قمر الليلة دي اختفى

وباين له مش طالع

بيني وبينك يدووووب

أقصى حدود الشوف ...

يا زمن جميل انتهى ..

كانت العيون بتشوف

والنجم مالي السما

كان الحجاب مكشوف

والسر كان الوفا

كانت القلوب صافية ..

وكنا نلضم ..

على ضي القمر مخياط

دلوقت فيه كهربا

وبلضمها بالعافية

( عشمتني بالحلق ..

خرمت انا وداني ) *

زغللتني بالنيون ..

وتركت قلبي بور

يا عتمة يا حنينه ..

لمي اللحاف لمي

وارمي الحمول ع الفقير

قومي احضني وضمي

دا كان يعدي الشتا ...

وانا تحت سهرايه

محلاه نهار الصيف ..

في ضل نخلايه

لا زيه فيه تكييف

ولا حتى دفايه

خدعونا بالكهربا ...

حلم الصبايا الحور ..

لا لحقت اطول الدفا ...

ولا طلت اشوف النور

ولا كنت احس بطراوة ..

ف عز برد امشير

ولا كنت احس بحرارة ..

ف عز صيف هاتور .

-----------------------------

* مثل شعبي