الشاعر شحاتة فكري .. وفر كلامك
وفر كلامك
مش فرض لازم يمشي ورا طيفك ألوف
الخوف بيعمل وقفه للإحساس ساعات
وساعات بيفتح ألف باب للشوف
فافتح طريق للنور وسيب
كل واحد يرسم الشمس بطريقته وينحت الضلمه بمزاجه
الخط بيكون مستقيم والناس
تشوف ف ضله اعوجاجه
فاعتزل واختار لنفسك زاويه شوف الموجه بيها
أو شط شوف البحر بيه
«فى البحر سمكة
بتزُق سمكة
ع الشط واقف
صياد بشبكة
في البحر موجه
بتزُق موجه
والشط زحمة
وزعيق وهوجة»
وانا وانت واخر لحظه قبل الطعم ما يشد اللي فاضل منا ليه
نفرق ف إيه
مين فينا راح ينشد م السناره قبل التاني ويغمض عينيه
أنا الأول
انا الأخر
ما عدش يفيدنا نتاخر ونفضل بالساعات واقفين في حيره وفكر
ياللي انت واخد روحنا منا لحد اخر سكتك
ابعت لنا لو فرحه بكر
أو حتى باقي فرحتك م الابتسام
كرمش لنا لو ضحكه حلوه احدفها حتى فوشنا
أو غشنا بزيف الكلام
اوهمنا ان الدنيا بيس
اوهمنا ان الكون تمام
لم اللي فاضل جوا مننا من هزايم روحنا فينا وبالغلط
احدف على حروبها السلام
واهمس فـ ودن الحزن
ناااام
ساحة النقاش